National Deworming Day 2017 chu ram chhung hmun dangte rualin vawiin khan Lawngtlai District-ah pawh hman a ni.

Lawngtlai District Chief Medical Officer Dr Thani Pachuau chuan Downtown English School, Lawngtlaiah he Day hi hawngin, rulhut pai avangin thisen tlakchham leh thluak lam hrisel lohna a thleng thei a, chu chuan rilru chak lo leh taksa pianhmang danglam leh natna dang dang a thlen thei tih a sawi a. Chumi laka naupangte an fihlim theih nan nu leh pa, pi leh pute bakah zirtirtute'n theihtawpa rulhut tibo tura thahnem an ngaihpui a tul thu a sawi. Naupangte'n hun bi nei taka rulhut hlo an ei a tul thu sawiin, rulhut hlo ei chuan pum lam nuam lo deuh pawh siam mah se, taksa tana tha tur zawk a nih avanga tuar hram hram peih a pawimawhzia a sawi a. Thu a sawi zawh hian, sikul naupangte chu rulhut damdawi (Tab. Albendazole) eitir nghal an ni bawk.

He National Deworming Day denchhen hian Lawngtlai District chhunga sawrkar sikul leh mimal sikul zawng zawng bakah, anganwadi, Lairam Motherless Home leh Observation Home-ah te rulhut damdawi (Tab. Albendazole) pek vek tum a ni a. Naupang sikul kai lote pawh pek tum niin, District huapin kum 1 atanga kum 19 inkar naupang 52,000 target an ni a. A thawh khatna hi February ni 15 thleng kalpui tum niin, a thawh hnihna chu August thla atanga kalpui leh tura ruahman a ni bawk.