2624/2026-2027

Aizawl the 12th October 2026: Vawiin khan Chief Minister Pu Lalduhoma chuan sorkarin Ainawn Venga Mizo Students Union tana ram a pekah MSU Building sakna tur lungphum a phum.

Thu sawiin Chief Minister chuan, kan ram leh hnam tana pawl pawimawh leh lian, kan hnam kal zelna tura pawimawh zui zel tur hi kan nei a. Chung zinga pawl tam zawk chuan mahni puala hmunhma neiin office-te pawh an nei tawh a. An zinga hmunhma leh office la nei ve lo chu MSU te hi an ni. Heng pawl pawimawhte hi ngelnghet takin awm se tih hi kan thinlungah a awm a. MHIP Office building thar tur kan sa mek a, MUP Office kan sak zawm mek a, YMA tan Thingsulthliahah Convention Centre lian tak kan sa mek bawk a.

Ainawn veng hi tun hmaa sorkarin sorkar hmunhma atana tha taka a duan a ni a, a sulsutu chu Chief Minister Brig T. Sailo kha a ni a. Ruahmanna fel tak nen a bul tan mah se a hnu lamah mumal taka kalpui zui a ni ta lo va. Kan sorkar hnuah Ainawna sorkar ramte hi a theih ang angin kan singsa a. Chu mi kan kalpuina lamah chuan kan tlawmngaipawl pawimawh zinga ram nei lo MSU tan he lai hmun hi kan pe ta a ni. An mamawh kha office a nih avangin office sakna tur sum hi ruahmanna kan siamsak zui zel a. Chuvang chuan vawiinah a lung kan lo phum thei ta a ni. Hun rei tak mahnia hmunhma leh office nei lo MSU te ka lawmpui em em a ni, a ti a. Building tha tak leh mawi tak sak kan tum dawn nia, a ti bawk.

Pu B. Lalkhawngaihzuala, President, MSU pawhin thu sawiin, MSU hian office hmun tur ram kan nei lo va, mahni pualin office kan nei lo va. Tun hma atang tawhin kan theih ang angin kan dap thin a. Kumin kumtir lamah khan Revenue Minister hnenah beiseina thar nen dilna kan thehlut leh ta a, kan Chief Minister hnenah kan thlen bawk a. Kan Chief Minister zarah MSU chuan kum rei tak kan lo beisei tawh ram chu Ainawn vengah kan nei ta a ni. Ram ringawt kha kan mamawh a ni lo va, building kha kan mamawh a ni si a. Chu pawh chu Chief Minister puihnain vawiina a lung kan lo phum thei ta a. Kan lawm em em a, MSU chuan engtikah mah Chief Minister Pu Lalduhoma hi kan theihnghilh thei tawh ngai dawn lo a ni, a ti.

He hunah hian MUP leh MHIP General Headquarters hruaitute pawhin thu an sawi a, sorkarin tlawmngaipawlte tana tun hnaia hma an laknaah lawmthu an sawi a ni.

Lungphum inkhawm hi Pu Zodinsanga, General Secretary, MSU chuan a kaihruai a, Pu H. Lalringliana, Adviser, MSU chuan hunserh a hmang a ni.