Muallungthu khua in kum 100 an tlin lawmna ni 3 chhung an neih chu, vawiin a ni thumnaah Chief Minister Pu Lal Thanhawla chuan a hmanpui.

Chief Minister chuan Muallungthu khua in hei leh chen Pathian kaihhruaina hria a, lawmna nachang an hria chu a ropui hle a, lawm nachang hriat hi Pathian duh zawng tak a ni a ti a. Muallungthu khua hi tun hma chuan a khawmi zahve deuhthaw chu zu zuar an ni thin a, tunah chuan zu zuar awm lohnaah an siam siam ta hi a ropui hle a ni a ti a, hei hian thil tha duh mi an nihzia a tilang a ni a ti. Aizawl a chengte mamawh, chawhmeh chi hrang hrang phuhruka chawmtu an ni a ti a. Pathianin mihringte chu rim tak leh beka thlantui tla zawih zawih chunga thawk tura a tih kan ni a. Hetianga hnathawkte chu khaw khatah pawh chhungkaw awm thei an ni deuh zel a ni a ti.

Pu Hawla chuan Pathianin chanchintha hmanga a zawnchhuahte kan ni a, chuvangin mihringte chungah chauh nilo, A thil siam zawng zawngte chungah chanchintha hril tura koh vek kan ni a ti a. Ringtu kan nih angin mawhphurhna leh tih tur tam tak kan nei a, kan awmna theuh hi A rawngbawl tura min dahna a ni tih hria a, taimakna leh dikna nen tui taka mahni hna theuh thawh hi kan tih tur a ni a ti. Chuvangin thatchhiatna te, zelthelna te, kutlinglova sum lak duhna te, tlemte thawha tam tak lak tumna te leh eirukna te lakah kan fihlim tur a ni a ti a. Kum 100 tlin lawmnaah hian chutiang lam hawia ngaihtuahna thar siam turin khaw mipuite chu a chah a ni.

Chief Minister chuan Muallungthu khaw mipui ten fai an ngaina chu an fakawm hle a ni tiin, fai hi chhung lam leh pawnlamah kan neih a tul a ni a ti a. Ei leh bara intodelh turin taimakna mai a tawk lova, hriselna tha kan neih a ngai a, hei hi chhunglam leh pawnlam faina hian a keng tel a ni a ti. Hrisello chungin a taimak theih loh a, min ti hrisellotu lian tak, zuk leh hmuamah kan fihlim a ngai a ni a ti.

Chief Minister chuan Kaladan Multi Modal Transit Transport Project hna kal meka harsatna awmte sawilangin, hna bul tan laia thuneitu, DC, PWD leh District Council ten diklo tak leh corrupt taka an kalpui vang a ni a ti a, hemi chungchang hi tun hnaia Lawngtlaia an sawihonaah a corrupt ho te chu a kuta dah tura a chah thu vawiin khan a sawilang a ni.

Chief Minister chuan Referral Hospitalah Aizawl Civil Hospital atanga department 5 sawn phei mai tur thu sawi bawkin, nakumah Medical College neih hman ngei tum anih thu a sawi a.

Chief Minister chuan Muallungthu khua in mi chhuanawm tak tak alo chherchhuah tawh thuah entawntlak a tih thu sawiin, Pathian kaihhruaina dawng zel turin duhsakna a hlan a. Kum 100 tlin hriatrengna thilpek a hlan bawk a ni. Muallungthu Centenary Celebration Organising Committee in Chief Minister Relief Fundah Rs.10,000/- Chief Minister hnenah hian an hlan bawk a ni.

Lawmna inkhawm hi VCP & Chairman MCCOC Pu R Lalhmangaiha’n a kaihruai a ni.

Muallungthu hi lal 5 in an awp thin a, Lal hmasa ber Tulera niin, a hnuhnung ber chu Chhuanvawra a ni a. Tunah hian in 267 awmin, mihring 1278 an awm mek a. Zirna In 4 a awm bawk. Kum 100 tlin lawm nan hian a khaw chengte atanga thawhlawm Rs. 5,71,690/- tiamin avaiin Rs.11,31,090/- thawhlawm hmuh a ni.