473/2023-2024

Aizawl, 17.05.2023: Chief Minister Pu Zoramthanga chuan tukin khan Multilevel Car Parking & Multipurpose Hall, Govt. Mizo High School, Aizawl chu a hawng. He hall sak chungchanga mawhphurtu a ruat chu Transport department niin a sak hna hi VINCO Construction in an thawk a. Tukin programme ah hian Transport Department chuan School Education Department hnenah building hi an hlanchhawng a ni. He building thar hawnna inkhawmah hian Transport Minister Pu T.J Lalnuntluanga leh bialtu MLA Pu C. Lalmuanpuia te an tel bawk.

Chief Minister chuan vawiin lirthei park na leh hall tha tak mipui hman tangkai tura hawn a ni chu lawmawm a tih thu a sawi a. Aizawl khaw din tirh a nih hunlai leh tun dinhmun khaikhin in a hmelhmang te, in awm zat leh lirthei tam dan te a inthlauh thu a sawi a. Tunah chuan khawpui tawt nen tihthawl dan tur kawng hrang hrang dap a ruahman a tul tak thu leh sawrkar pawhin parking house scheme a siam thu a sawi a. Ram hmasawnna tur ruahmantu chuan ngaihtuahna fing tak nen hmathlir thui tak a neih a pawimawh zia a chian thu a sawi. Chief Minister chuan PAHOSS chungchangah mi engemawzatin hna an thawh zawh hnu ah hripui lengin a hrin sum indaihlohna avanga tum anga hma a lak chak theihloh thu a sawi a. Hmalakna erawh la tawp lovin, ruahmanna siam zel a nih tur thu a sawi. Sum indaihlohna karah theihtawp a hna thawh a nih zel thu sawiin, resource mobilization committee te din niin, chungte kaltlang chuan kan resource neih hrang hrangte mipui hlawkna turin, kan zavai tangkaipui tura hmalak zel dan tur ruahman zel a nih thu a sawi a. Vawiina hall hawn tak chu tangkai taka hman a nih ngei a duhsak thu a sawi a ni.

Transport Minister Pu TJ Lalnuntluanga pawhin building tha tak tangkai tak tur hawn a ni ta chu lawmawm tiin, School Education department leh khawtlangin tangkai taka an hman a duhsak thu a sawi a. Hmasawnna ruhrel hrang hrang din kawngah sawrkarin nasa taka hma a lak tawh dan leh a lak belh zel tur thu a sawi a. Transport Minister chuan tun hnaia department in hmasawnna a hmuh thenkhat tarlangin, March ni 11 leh ni 12, 2023 khan DTO Office Serchhip leh Commercial Vehicle Terminal Building, Tlabung hawn a nih thu te, Automated Vehicle Inspection & Certification Center, Hlimen sak mek chu peihfel thuai beisei a nih thu te a sawi a. He Center hi puitlin a nih hunah chuan khawl hmangin lirthei him leh him lo endik a ni tawh tur thu a sawi.

Veterinary, Fishery and Agriculture Board Vicechairman Pu C. Lalmuanpuia, bialtu MLA ni bawk pawhin thu sawiin, he building tha tak sa tura hmalak a nih chhoh dan leh sawiin, vawiina a hlawhtlinna hmuh a ni ta chu lawmawm a ti a. He building hi puitlin a nih theih nan a tha thawhtu zawng zawng leh tawiawmtute zawng zawng chungah lawmthu a sawi a. Parking area chuan nasa takin a bulhnai a lirthei dahna indaihlohna chu a chhawk ngei a beisei thu a sawi a. Court pawh tangkai taka hman a nih ngei a beisei thu a sawi bawk.

Tukin Multilevel Car Parking & Multipurpose Hall hawnna inkhawm hi Pu Lalzirmawia Chhangte, Secretary, School Education Department chuan kaihruaiin a sak hna thawktu VINCO Construction CEO Pu Vanlalhluna chuan technical report a pe a, Transport Department Director Er. R. Lalrammawia chuan lawmthu sawiin hun a khar a ni.

Vawiina building thar hawn hi state sum atanga sak niin a vaiin Rs. 610.06 lakhs (main building Rs. 495 lakhs, vertical extension Rs. 50 lakhs, mass concrete Rs. 60.06 lakhs & monitoring Rs. 5 lakhs) hman a ni a. February ni 1, 2021 khan inremna thu ziah niin thla 24 chhungin (February ni 1, 2023 thleng) sak zawh tura ruahman a ni a, rokhawlhna eng eng emaw avangin April ni 30, 2023 thleng khan hun pawhsei a ni. He building hi 620 sqm a zau niin chhawng thum a awm a. Basement ah hian car 15 leh 2 wheeler 30 lengin, ground floor ah car 18 leh two wheeler 21 a leng bawk a: a vaiin car 36 leh 2 wheeler 51 a dah theih a ni. Third floor ah hi multipurpose hall atanga ruahman niin, hetah hian badminton court pathum a awm thei bawk a ni.