473/2023-2024

Kolasib dated 17th May 2023: Vawiin chawhnu khan Govt. Kolasib High School chuan High School Leaving Certificate Examination 2023 result chhuak a zirlai exam pe zawng zawng an pass avangin a lawmna hun an buatsaih a. Minister Pu K.Lalrinliana chu khuallian niin Pu Vanlalkunga, Headmaster chuan hun a kaihruai a ni.

Minister Pu K.Lalrinliana chuan Govt. Kolasib High School a zirtirtu leh zirlaite thawhrimna avanga hlawhtlinna hmel duhawm tak an hmu chu lawmawm a tih thu sawiin HSLC exam-a hlawhtlinna chang zirlaite chu khawtlang tan a mi tangkai leh chhawrtlak ni zel turin a chah a. India ram state pakhat kan nih angin thiamna leh finna hai chhuah kawngah te, hna leh eizawnna dap kawngah te mahni hnam tawng bakah Hindi thiam ngaih pawimawh a tul thu Minister chuan a sawi. Hlawhtlinna tluantling nei tur chuan tun atangin eizawnna kawng an dap dan turah rilru siam fel a pawimawh thu Minister chuan sawiin tum mumal tak nei chungin, zirna tibahlah thei ruihhlo lak a fihlim chung a, zirna kalpui thin te chuan hlawhtlinna an chan thin thu a sawi. GKHS a?anga HSLC exam-a hlawtlinna chang zingah raltlan zirlai an awm chu lawmawm a tih thu Pu K.Lalrinliana chuan sawiin kan State thenawma zohnahthlak unauten harsatna leh buaina an tawh lai a khawtlangin an lo tuam hlawm dan te chu fakawm a tih thu a sawi a. Zohnahthlak zingah inpumkhat duhna rilru put a tul thu leh inunauna leh inlungrualna tha chuan hnam ropui leh zahawm tak ah min siam theih thu a sawi bawk a ni.

Pi K.Lalremsiami, District Education Officer chuan Govt. Kolasib High School-in HSLC exam-a result tha tak an nei chu a lawmpui thu leh zirlaite leh zirtirtute nasa zawk a tan la tur a phurna petu a hmang turin a chah a. Naupang ten zirna an ngainat lehzual nan nu leh pate pawhin in lamah zirna boruak tha an siam a pawimawh thu a sawi.

Pi Lalchungnungi, Teacher, GKHS tarlan danin kum 2022-23 HSLC exam petu zirlai 22 zingah Distinction 1, 1st Division 5, 2nd Division 11 leh 3rd Division a pass 5 an awm a, HSLC beitu 100% pass an neih tum 3-na a nih thu a sawi. Pu RV Thansanga, Former Headmaster, Govt. Kolasib High School chu kum 1970-a din a nih dan te, infiamna lam a Kolasib lo tihmingtha thintu an nih dan te leh thawktu hmasate chu District dinhmun a Kolasib hlankai a nih kawngah pawh mi tangkai tak tak an nih thu a sawi a. Govt. Kolasib High School chu Kolasib tihmingthatu ni zel turin zirtirtu leh zirlaite chu inpekna thuk tak nen an mawhphurhnate hlen chhuak zel turin a fuih bawk a ni.

Govt. Kolasib High School HSLC Exam Result lawmnaah hian zirlaite atangin hnam lam leh zai te entir a ni a. Minister Pu K.Lalrinliana chuan zirlai exam hlawhtlingte hnen ah lawmpuina thilpek leh School Library-a dah tur lehkhabu a hlan bak ah a tul apianga hman tur  cheng Nuai 1 a ruahman tur thu a sawi a. Pu C.Lalsangliana, Teacher chuan lawmthu sawina hun a hmang bawk a ni.