Vawiin khan Chief Minister Pu Lal Thanhawla'n Mizoram Sawrkara thawk Vety doctor te inzawmkhawmna pawl Mizoram Veterinary Service Association Annual General Conference vawi 33-na, Thenzawla an buatsaih chu khuallian niin a hmanpui.

Chief Minister Pu Lal Thanhawla chuan ranvulh leh enkawl animal husbandry hi kuthnathawh (agriculture) peng khat a ni a, ram changkang apiangin hemi lamah hian kuthnu an nei tam a. India leh China ramah hian khawvel puma ranvulh za zelah 70 vel a awm a, mahse heta tanga farm produce hi za zelah 25 vel chiah a tling a, hei hian a that lam quality leh hlawk zawka vulh productivity ah te tan lakna tur a awm tih a entir a, Mizoram pawhin hemi kawngah hian tan lakna tur kan nghah hle tih min hriat tir thei a ni a ti.

Mizote hi hmasang atangin kan hnam nunah ranvulh hi a bet a, hma pawh kan sawn chak hle a, mahse sa ei hnam kan nih angin sa hrang hrangah kan intodelh lova, ram dang atangin bawng leh vawk talh turin kan la lalut tam a, hemi avang hian ran natna te a changin a darh phah a, harsatna te kan tawk thin a, hengte ngaihtuahin engtin nge kan intodelh ang tih hi Department tan chona lian tak a niin ka hria a, he chona hi hriain tan la zel turin ka duh che u ni, a ti. NLUP leh eizawnna hawi programme dangah abik takin ranvulh ang chi te telna ah hian beneficiary te hi an ram neih ang leh an tuina te ngaihtuahin, enge an thatpui ber ang tih ngaihtuahpui a pawimawh a, mithiam in kaihhruai leh thurawn in pek a pawimawh a, kawng in kawhhmuh that chuan an hlawhtlinna pawh a pung thei a, chu chuan sa leh ran lamah intodelhna a thlen tir thei a ni, a ti. A sawi zel naah ranvulh hian ram enkawl (land management) a keng tel a, hlawk zawk leh tha zawka kan ram neihte hman tangkai thiam a pawimawh a, ram enkawlna (land management) leh chu ramin eng thleng nge a dawl ang tih bithliahna (land capability) classification te hi changkang zawka kan kalpui a pawimawh a. Ran tlatna tur ram (grazing land) hi enfel pui hmasak a ngai a, hetia kan tih hian nakin zelah harsatna thleng thei tur kan pumpelh thei a, ram hman pawh a daihzai zawk thei a ni, a ti.  

Ranvulh hlawk turin a ran chi tha kan neih a pawimawh a, ran vulh tawp nilovin a enkawlna lamah hma kan sawn a ngai a, mi tam takin ranvulh hi eizawn nan an hman tawh avangin a quality leh quantity lamah tan lak a ngai a, hlawkzawka tharchhuah tihpuna hralhchhuah tur nei tam hi Sawrkar programme thar NEDP tum chu a ni, a ti. Mizote hi ranvulhna lamah tunhma ngaihtuahin hma kan sawn nasa hle a, chu ti chung chuan tan lakna tur leh chona (challenge) kan ngah a tiin an hnathawhna kawngah leh Mizoramin ranvulhna kawnga hma a sawn zel a, sa, bawnghnute leh artui a state a intodelh theih nan theihtawp chhuah turin Vety doctor kalkawmte chu a chah a. Mizoram in ei leh bar, sum leh paia a intodelh theih nan Department pawimawh zual bik awm mahse Department tin hi a pawimawh a, ram leh hnam tana thawhhlawk thei ni theuh turin ka chah duh che u tiin an theihna leh thiamna te ram leh mipui rawngbawlna kawngah tun aia nasa leh zawka hmang turin a chah bawk a ni.

Chief Minister hian Thenzawl Vety. Complex ah RKVY sum hmanga sak Farmer's Demonstration Centre a hawng bawk a ni.

Khualzahawm AH & Vety. Minister Pu C. Ngunlianchunga pawhin thusawiin duhsakna an dawn chu an thil tihah leh an hnathawh ah lang sela tiin an hmazawn theuhah tih tak zeta hnathawkin Mizoram mipui tan rah duhawm chhuahtu ni turin Vety doctor te a chah a. Department hming tha mek chu thawktute inpekna leh thawhrimna avang a ni tiin hei hi chhawmnung zel turin a fuih bawk a ni.

MVSA Annual Conference hi nihnih chhung neih niin vawiin hi a ni hnihna leh a tawp ni a ni a. Conference hawnna programme hi an pawl Vice President Dr. Lalremliana’n kaihruaiin an pawl President Dr. Lalhmingthanga'n Presidential Address sawiin Mizoram Sawrkar in veterinary service pawimawhna hriain an service rules te a siamthat sakin, an dinhmun sang ta chu lawmawm tiin lawmthu a sawi a ni. Department hmalakna in Thenzawl Vety hmun tihchangtlun tum dante a sawi lang a ni. General Secretary Dr. Engkunga Chhangte in Conference thurel puanchhuahna hun hmangin Dr. Saingura Sailo Adviser in lawmthu sawiin Conference kharna a nei a ni. MVSA Conference ah hian Chief Minsiter's Relief Fund ah cheng 1,00,001 an chhunluh tur thu an puang a ni.

MVSA hi 1972 khan din niin tunah hian Member 103 an awm mek a ni.