Delhi a cham mek Chief Minister Pu Lal Thanhawla chuan tunkar Nilaini khan External Affairs Minister Pi Sushma Swaraj chu a Office ah hmuin inkawmhona hun tha tak an nei a. April thlaa Myanmar a zin tuma thil a hmuh dante hrilhin India leh Myanmar inkara inlaichinna tha zawk a awm theih nana kawng hrang hranga hma lakna awm thei  nia a hriat te hrilhin hemi chungchang hi darkar khat chuang an sawi dun a ni.

Chief Minister Pu Lal Thanhawla chuan Myanmar ramah Zohnahthlak tam tak an awm thu leh an Parliament ah pawh Zohnahthlak MP 25 lai an awm thu te hrilhin Myanmar-a Zohnahthlak leh Mizoram mipuite inkara inunauna leh inlaichinna boruak tha, thuk leh duhawm tak a awm a,  hei hi ram ram pahnih te inthian thatna kawnga thil tangkai tak a nih theih thu a sawi.

China in Myanmar ah hmalakna pawimawh thahnem tak a nei mek a, chak taka tuna  hmalakna hian  nakin zelah India leh Myanmar ramri ah inepna boruak thalo a thlen theiin India tan harsatna lian tak a la siam thei dawn nia a hriat thu a hrilh a. Hemi avangin China inlak lenna veng turin Myanmar ah kan hmalakna te hi India in kan tih chak a pawimawh a. Myanmar mipui pawhin India nen thawhhona tha  neih an phurpui leh an thlawp nia a hriat thu hrilhin he kan tana mipuite te ngaihtuahna inhawng hi India chuan kan hman tangkai leh hman thiam hi thil tul tak niin ka hria a ni, a ti.

Ramri a insumdawntawnna chungchang sawi langin ramri a sumdawnna ruhrel buatsaihna kawngah tun aia chak zawka hmalak a tul tiin Zokhawthar a Land Custom Station chu hman theih a nih tawh thu leh World Bank sum hmangin Champhai-Zokhawthar kawng chu tihzauh leh siamthat mek a nih thu te a hrilh a. India lamah chuan engemaw chen ruhrel leh kawng tha te kan nei tawh a, mahse Myanmar lama kawng te a la that loh avangin keini zawk hian kan hlawkna tur ngaihtuah zelin an ramah hemi kawngah hian hma kan lak a ngai a tiin a hrilh a. Mizoram sawrkar chuan Myanmar lamah ramri depa kawng 2/3 vel chu chei a duh thu sawiin hemi hi thawk thuai thei tura phalna pe turin a ngen.

Ram pahnih mipui ten awlsama taka an intlawh pawh theih nan tuna dan awmsa te hi ram pahnih ten ennawn a tul thu te sawiin hemi kawngah hian hma laksak turin External Affairs Minister a ngen a.  Khampat Bungpui chungchang sawi langin Chief Minister chuan he Bung hian Mizo history ah hmun pawimawh tak a luah a, kum zabi 1700 velah kan piputen Mizo insuihkhawmna atan an phun a ni, a ti a. Nikum a thlipui tleh in he bung hi a tichhiat thu hrilhin he bung dinhmun derthawng veng turin helai hmun hi thuamthat a, Mizo te insuihkhawmna lantirtu thingkung hi humhalh a tul a ni, a ti a. He hmun hi humhalh a nih theih nan a tul anga Myanmar Sawrkar rawn chunga hma laksak turin a ngen bawk a ni.

Ram pahnih ve ve te hlawkna tur ngaihtuah chungin Mizo hruaitute tan tlawhna remchang a khat tawka siam a tul thu a sawi a. Hemi chungchangah hian a khat tawka Myanmar tlawh phalsak turin leh Myanmar-a Mizo Chief Minister te sawm tura phalna pe turin External Affairs Minister Pi Sushma Swaraj  ngenin a hun neih remchang hmasa berah Mizoram tlawh turin a sawm bawk a ni.