Vawiin khan Mizoram University(MZU) chuan zirlai exam a hlawhtling te hnena degree hlanna hun, MZU Twelfth Convocation chu MZU Multipurpose Hall-ah an hmang a. He hunah hian Mizoram  Chief  Minister Pu Lal Thanhawla chu khuallian a ni.

Convocation thuchah a sawinaah Chief Minister Pu Lal Thanhawla chuan kum 17 chhung lekin Mizoram University chu University puitling, India ram zirna in tha fal zinga mi  - Campus chhunga nizung chakna hmanga power hman tur siam chhuah kawngah te, Laboratory changkang bik neih kawngah te leh Information  & Communication Technology hmanga Classroom siam phuisui kawngah phei chuan hmahruaitu zinga mi a ni a ti. MZU in Direct Benefit Transfer(DBT) kalpui a tum chu a chhuanawm tih a sawi a; Research huanga MZU  hlawhtlinna tam tak zingah Physics hnuaia EPEN Nuclear Code  leh Biotechnology hnuaia Cancer Research  a hlawhtlinna chungchang bik phei chu inchhuanna tham a ni a ti.

Chief Minister chuan  MZU chu kawng tam taka a hlawhtlinnaah te lungawi mai lova hmasawn leh zual tuma ke a pen zel a ngai  a ni a ti a. MZU hlawhtlinnaah Zirtirtu, zirlai nu leh pate leh Zirlaite chungah lawmthu sawiin Zirlai te chu mithiam pui pui an lo nih hnu thlenga an nungchang hlauhlo tur leh ingaihtlawma, hawihawm reng turin a chah a ni.

Ram hmasawn ngaihtuahin sawrkarin theihchhuah chhuahin hna a thawk mek zel tih convocation chhimtute chu a hrilh a; Mizoram in a mamawh tam tak zingah sawrkar leh mipuite thawhhona hnuaia kalpui chi Skill Development chu dah pawimawh zual a ni a ti a. Mizoram in a mamawh chu remhriatna bik nei leh kawng hrang hranga a nachang hria-mithiam tam zawk chherchhuah a ni a tih sawiin ram hmasawnna atana tihtur neia inhria mithiamte chu NEDP hnuaiah Entrepreneur rawn niin sawrkar nen MEDMOC kaltlangin an thawkho mek tih a sawi a. Chief Minister chuan mithiam tak tak entrepreneur ni tura an rawn pen chhuak chuan mawhphurhna changtu anih ang pawha a tih lawm tak zet thu sawiin ram tana thahnem ngaih tuma phur leh tuihal, mithiam tam zawk Mizoram in a mamawh a ni a ti. Ram hmasawn nan Science leh Mathematics thlahthlam theih a nih loh thu sawiin India ram hmundangte angin Science leh Math-ah Mizo thalai ten hmasawn an tum a tul thu sawiin India rama ziak leh chhiar thiam tam ber dawttu nihna chu Mizoram in a taka a chhawr tangkai a hun tawh a ti. 

MZU Vice Chancellor thar Prof. KRS Sambasiva Rao pawhin thusawina hun hmangin kawng hrang hranga MZU hlawhtlinna te sawi langin chak zawka hmalak a nih tur thu te leh MZU in zirna huang zinga a thlur deuh bik tur te a sawi a. Mizoram  sawrkar  leh MZU thawhhonna tha tak chu chhunzawm zel a ni anga, Research ngaih pawimawh a ni anga, company lian deuh te pawh thawhpui tum a ni anga, MZU chu India hmarchhak bial bakah India ram chhunga zirna in tha ber zingah hlankai a nih theih nan tan lak a ni zel dawn ani a ti. 

Mizoram University hi kum 2000 khan Act of Parliament hmanga din a ni a; tunah hian National assessment and Accreditation Council(NAAC) in Grade'A' ah a dah mek a ni. Tunhnaiah khan National Institutional Ranking Framework(NIRF) chuan India rama Zirna in 3000 chuang a thlanchhuah zingah Zirna in thaber 94-na ah MZU hi a dah a; Kum in chhunga Universities 700 a thlanchhuah zingah 58-na a ni mek bawk a ni. 

MZU Convocation  vawi 12-na Programme chu Vice Chancellor remtihna in MZU Registrar Pu C. Zothankhuma'n a hawn hnuah ruahman lawksa anga kalpui a ni a; Chief Minister Pu Lal Thanhawla'n Ph.D Degree dawngtute hnenah Degree Certificate a sem a, M.Phil Degree nei thar te hnenah Vice Chancellor  Prof. KRS Sambasiva Rao chuan Degree Certificate a sem a, Gold Medal dawngtute chu Prof. Lianzela'n Medal a sema, Prof J.K. Patnaik hnen atangin Book Prize dawngtuten lawmman an dawng thung a ni. Convocation  hi MZU aiawh in Professor zinga Senior ber, Prof.Lianzela'n lawmthu a sawi hnuah Registrar Pu C.Zothankhuma'n Vice Chancellor pawmpuina in a khar a ni.

MZU Twelth Convocation-ah hian Vice Chancellor  Prof. KRS Sambasiva Rao chuan zirlai hlawtling 6970 hnenah Degree a pe(Conferred) a; heng zinga 1614 hian Convocation an chhim a ni.  Degree nei zingah Gold Medal 88, doctor of Philosophy 58, Master of Philosophy 39, MA 298, MSc 287, MSW 34, M.Com 26, MBA 30, Master's Degree(MJMC) 19, Master's Degree(Lib & Info.sc) 31, B.Tech 33, M.Ed 10, MCA 14, BA 395, BSc 203, LLB 1, Bachelor of Social Work 1, B.Ed 29, BBA 26, RIT 2 leh BCom 78 te an ni.