New Economic Development Policy 2016-17 hnuaia hmalakna, Tourism Department leh ICFAI University Mizoram tangkawp buatsaih ni hnih awh tur Capacity building and Rural Homestay Training Programme chu vawiin atang khan Champhai Venglai Commmunity Hall-ah tan a ni. He hun hi Pi Lalsangpuii Hmar, Addl. DC Champhaiin khuallian niin a hmanpui a. He training hi kumin May ni 31-a Pu JH Rothuama MLA and Chairman, NLUP Implementing Board (NIB) hova Champhai District chhunga Rural Homestay Scheme kalpui dan tur chungchang meeting neih tak bawhzuina leh hmalakna kal zel a ni.

Khuallian chuan NEDP kaltlanga sawrkarin Mizorama Rural Homestay Scheme hmasaber tur Champhai District-a kalpui a tum chu lawmawm tiin inpuahchahna chi khat homestay partner-te tana training mumal tak huaihawt a ni chu thil pawimawh tak anih thu a sawi a. Champhai chu pipute sulhnu pawimawh tak tak awmna a nih avangin hmalakna tur hmun duhawm leh remchang tak a ni tiin hemi kawngah hian mipui, sawrkar leh khawtlang kan tanrual a ngai dawn a ni, a ti a. Rural homestay chu mahni ina man chawia khualzin thlen anih thu sawiin  hnam nunphung leh ziate an hmuha an hriat ve theih nana ruahman a ni, a ti a. Khualzinte hipna leh eizawnna anih mai bakah hnam ziarang leh nunphung chawisanna hmanraw tangkai tak anih thu a sawi a. Tunhnaiah tourism lama inelna a thang chak hle a,  thenawm state-ah te pawh Rural Homestay Scheme hi kalpui anih tawh thu leh Mizoram sawrkar  pawhin kalpui turin hma a la mek zel a ni, a ti a. Training tura lo kalkhawm mipuite chu pipute sulhnu vawnghimtu ni turin a chah a, khualzinte dawnsawn kawngah leh hun hlimawm tak an hman theih nan  hmala turin a fuih a. Training chu hlawkpuia, a taka chhawr tangkai theuh tura chahin, Champhai district-a Rural Homestay Scheme kalpui dan chu district dangte tana entawntlaka siam ngei thei tura tan la turin a chah nghal bawk a ni.

Vawiin training programme hi Pi Zairemmawii Ralte, Assistant Professor, ICFAI University Mizoramin kaihruaiin kalkhawmte inhmelhriattirna a nei a.  Resource person Pu Ramnunmawia Pachuau, Assistant Professor, ICFAI University Mizoram hnen atangin ‘Homestay’ tih thupui hmang leh Pi Zairemmawii Ralte, Assistant Professor, ICFAI University Mizoram hnen atangin ‘Ei leh in thianghlim leh hmunhma enkawl dan’ tih thupui hmangtea zirtirna ngaihthlak a ni a. Zawhna leh chhanna hun hman niin homestay partner ten an hlawkpui hle a ni.

Training chhim tur hian Rural Homestay Scheme kalpuina tura thlan chhuah  heng; Vangchhia, Dungtlang, Vaphai, Zokhawthar, Hnahlan leh Chawngtlai khua atang ten Homestay partner-te  an tel kim hle a ni. Training hi naktuk lamah chhunzawm tur niin practical leh hriat ngai ang angte inhrilhhriatna hun hman leh tura ruahman a ni.

Homestay hi a awmzia ber chu khualzinte a khaw mi ten khual tha anga mahni ina an lo thlen hi a ni a. Mikhualte hi sum chawiin a khaw mite inah an thleng anga, thlen chin bithliah a awm lova, zan khat atanga a thla ang zawng pawhin an cham thei dawn a ni. Rural Homestay Scheme hnuaiah hian Champhai hi Pilot District niin khaw paruk – Vangchhia, Dungtlang, Vaphai, Zokhawthar, Hnahlan leh Chawngtlai khuate thlan an ni a. Heng khuaah hian chhungkaw thlanchhuah (Homestay Partner) ten mikhual thlenna tur pindan / in sa in mikhual an thleng thei ang a, ram chhung leh pawn atangin a duh apiang heng khuaah te hian riahchilha an ram chhehvel fang tur leh an nunphung leh khawsak anga va khawsaa hun va hmang thei turin ruahmanna siam a ni.