Vawiin chawhma dar 11:00 khan District Bawrhsap Pi Sangchhin Chinzah hovin a office-ah Village Council Conference cum Panchayat Sammelan neih dan tur chungchang ngaihtuahin meeting neih a ni.

Bawrhsap chuan Village Council Conference neih tur hi State Institute of Rural Development & Panchayati Raj atanga ruahmana lo kal anih thu sawiin, ni 12 leh 13 December, 2017 chhungin he hun hi hman tur a ni a ti a. District chhunga Village Council tinten an huam chhung theuha khawtlang tana hmasawnna hna an thawhte, mipui an kaihhruai dan te phochhuahna hun tur kan buatsaih thei tur hi a lawmawm a ni a ti a. Village Council ten ram leh khawtlang tana hma an lak zel dan turte leh ruahmanna tha zawk an neih theihna tur atana inrawnkhawmna hun tha tak anih tur thu a sawi bawk a ni.

He Conference DC Conference Hall, Serchhipah neih tur niin; ni hnih chhung a awh anga, a ni khatna ah hian khuallian atan Pu Lal Thanhawla, Hon’ble Chief Minister, Mizoram chu beisei niin, khualzahawm atan Pi Vanlalawmpuii Chawngthu, Hon’ble Minister of State beisei a ni bawk ani. SIRD atanga mithiam lo kal ten thupui thlan bik hmangin zirtirna an pe anga, a ni hnihna ah hian District chhunga Village Council hmalakna hrang hrang- mipui rorelnate, faina kawnga hmalak dan leh  hmasawnna kawnga hma an lak dante ngaihthlak a ni anga, VC ten an duhzawng sawiin rorelna hun an hmang dawn bawk a ni.

Conference chhung hian Village Council tinin kum kaltaa an hnathawhte mipui hmuh theih turin thlalak an pho chhuak anga, chung zing atang chuan a ti thate thlang chhuakin lawmman 1 na atanga 3 na thleng pek an ni dawn bawk a ni.

Meetingah hian Pu Chuauhnuna, Addl. DC, Pu VL Remliana, Project Director, DRDA leh BDO Serchhip RD Block, Pu R. Vanrengpuia, SDO (S), Pu Beitlotha Nohro, District Local Administration Officer bakah BDO E. Lungdar aiawhte, Pi Vanthangpuii, District Urban Development Officer leh Pi R. Lalmuankimi, Superintendent, DC Office Serchhip te an tel a ni.

Attachment

  • Loading attachment...