Vawiin chawhma dar 10 khan Hrangbana College Prayer Hall ah Accountant General (A.G.) Office, Mizoram huaihawta Training  on Official Correspondences & Accounting for Contractual Engagements of MZU Graduates chu Chief Minister Pu Lal Thanhawla'n a hawng.

Hawnna thu sawiin Chief Minister chuan Finance Commission Member a nih lai atanga sum enkawlna tha tel lova thiltih tak tak leh hmasawnna mumal thawh a harsat zia a lo vei tawh thin thu te a tarlang a, sum enkawlna tha kan neih theih nana chutiang training programme buatsaih a ni chu Comptroller Auditor General of India (CAG) Pu V. K. Rai chungah lawmthu a sawi. Reconcilliation of Accounts buaipui tura Shillong kal a la ngai fo chu a hautak avangin Mizoram A.G. Office chu a nihna ang taka thawk thei tura thuam a pawimawh thu CAG hnena Chief Minister-in a lo thlen tawh chu bawhzui chhoh mek a nih thu te a sawi lang bawk. Tuna Economics & Commerce Graduates te tana Training buatsaih chuan hun tha leh remchang a siamsak dawn a, ram tana chhawrnahawm ni tura taima tak leh thahnemngai taka inzir turin a chah bawk. Sorkar Laipui chu kan tan a inhawng em em a, a hmunhma, ruhrel leh sum harsatna avangin duh angin kan chhawr tangkai thei lo zawk a ni, a ti. Institute of Mass Communications te, Indian Institute of Technology te, Institute of Fashion Technology te pawh Mizoram-a din turin an inhawng em em a, a theih ang angin sorkarin a bawhzui chho mek a ni, a ti bawk. Zirlai lehkhathiam te tan kawng zau tak a inhawng chho dawn a, tun atanga uluk taka thalai te lo inbuatsaih turin Chief Minster chuan a fuih bawk.

Training hawnna inkhawm hi Sr.Deputy A.G. Pu Vanlalchhuanga, IA&AS -in a kaihruai a, A.G. Pu Vishal Bansal, IA&AS chuan Training buatsaih tura Chief Minister phurpuina leh tawiawmna ah lawmthu a sawi a, Training hmang tur te chuan sorkar office hnathawh dan hmang leh accounts vawn dan te an zirchhuah hnuah sorkar tan pawh an la tangkai hle dawn a ni, a ti. Mizoram University Vice Chancellor Prof. A.N.Rai pawhin Chief Minister Pu Lal Thanhawla chu Mizoram-a zirna tihhmasawn vei tak leh thawhpui nuam tak a nih thu a sawi a, Computer Software Company lian Infosys te pawhin Mizo thalai te rawih an duh thu MZU hnena an rawn sawi thu te tarlangin tuna training chuan kawng a hawnsak dawn a, a bak chu mimal-in an bawhzui thiam a pawimawh dawn a ni, a ti. Training tur hian Economics & Commerce Graduates 50 thlan an ni a, thla 11 chhung an zir dawn a ni.