No.3801/2021-2022
Aizawl January 25, 2022: Chief Minister Pu Zoramthanga chuan tukin zing dar 7:30 am khan MINECO chhungah MIZOFED Petrol Pump thar chu hman theihin a hawng. He hunah hian Cooperation Minister Pu C. Lalrinsanga pawh telin, gas cylinder chhuak thar, Indane Composite chu a tlangzarh bawk.

Chief Minister chuan mipui tana tangkai tur thila MIZOFED hmalak zelna chu lawmawm tiin, hmasawnna atana cooperative movement pawimawhna a sawi a. Hlawk tura thil tam tham a tharchhuah, sawngbawl leh a zawrhna tur market zawn thlengin mimal ang chuan thil hautak tak a ni thei a ni a, mahse cooperative anga hmalak chuan thil tih a chakin a awlsam phah thin thu a sawi a. Hetiang a nih avang hian sawrkar pawhin cooperation society movement chu a ngaihpawimawh thu a sawi. Chief Minister chuan hlawhtling tur chuan harsatna hrang hrang tawhte malsawmnaa siam thiam a, tangkaia siam nachang hriat pawimawh a ti a. Hrilengin khawvel tibuaiin, Mizoramah ngei pawh hmasawnna hna hrang hrang thuanawp phah mahse, heng harsatnate hi thil tha zawk atan hman thiam tumin rilru siam thiam pawimawh a ti a. Chutiang chuan MIZOFED hruaitute pawh an kal zelna turah theihtawp chhuah zel turin a duhsakna a hlan a ni.

Cooperation Minister Pu C. Lalrinsanga chuan cooperation hnuaia federation pawimawh tak MIZOFED in bung thar a kai leh hi lawmawm ka ti a. Tun dinhmunah Mizoramah MIZOFED chuan dispensing unit pakua a neih tak thu sawiin, Kawnpui, Saitual leh Tlabung ah te chhunzawm la tum a nih thu a sawi. Minister chuan Mizofed chu mipui mamawh phuhruk kawngah thawk tha tiin, oil & gas mai bakah nitin mamawhte chawkluh te, covid boruak in a hrek beh tak tak laiin vegetable supply chain lama an hmalak danah te fakawm a ti a. Vawiina pump hawn tak pawh MINECO a thawkte leh pisa dawrtute bakah thenawm vengte tana tangkai tak a nih a duhsak thu a sawi.

Vawiina tlangzarh tak Composite cylinder chu technology tha tak nen thuam a ni a. Blow-moulded inner lines polymer-wrapped Fibre glass leh a pawn lam HDPE a siam a tuam a ni a. Size pahnih - Kg 5 leh kg 10 awmin, tuna gas cylinder thira siam kan hman mek aiin a chanve velin a zang a ni a.

Vawiina hawn tak Petrol Pump ah hian thawktu Manager nen mi 5 awmin, duty hun ( timing) hi 6am - 7 pm a ni a. A tul dan anga heihi la sawi danglam leh theih tura ruahman a ni. DU (Dispensing Unit) pahnih (nozzle 4) awmin, underground tank Petrol 20kl leh Diesel 20 kl te phum a ni a. Electric hi 25Kva transformer IOC lamin rawn tumin a bun hna hi P&E lamin an buaipui a; Diesel Generator 30 kva hman nghal theih a bun fel a ni bawk. Public facility atan Water cooler leh toilet peih fel a ni a. Air compressor pawh fit mai theih turin a bungrua dawn tawh a ni.

Vawiin petrol pump hawnna inkhawmah hian Tuirial Constituency bialtu MLA Pu K.Laldawngliana leh Cooperation Department hotute an tel a ni.

Vawiin programme hi Pu K. Rothangpuia MIZOFED Chairman chuan kaihruaiin, POL Division, MIZOFED chuan Mizoram sawrkarah kum tin VAT ah cheng vbc 20 a chhunglut thin tih a tarlang a ni. Managing Director Pu Rinzuala hnen atangin report ngaihthlak a ni bawk.