No.3802/2021-2022
Aizawl January 25, 2022: Vawiin khan UD&PA leh Aizawl Municipal Corporation tangkawp chuan Aizawl khawpui chhunga kawngsira thil zuar (Street Vendors)-te tan Loan Camp Dawrpui Multipurpose Center-ah a buatsaih a. Camp hawnna Programme hi Pu Lalrinenga Sailo, Aizawl Mayor in a hman pui a, Pu K. Laldingliana, Municipal Commissioner, Pu H. Lalhmingthanga, Joint Municipal Commissioner leh Official dang ten programme hi an hman pui bawk a ni.

India ram puma COVID hrileng mek avanga kawngsira thil zuar harsatna tawh mekte an intunnun leh theih nan PM-SVANidhi scheme atangin loan pekchhuah mek zel a ni a. Loan Camp-ah hian AMC in street vendors survey a lo neih tawh hmanga ID a pekchhuahte zinga loan la duhte chu online-in dilna thehluh sak an ni.

PM-SVANidhi scheme hi 1st June 2020 khan Prime Minister in a hawng a, Aizawl bikah hian 8th July, 2020 atangin Aizawl Mayor Pu PC Lalhmingthanga hovin kalpui tan a ni. Loan dilna thehlut tawh mi 322 atangin mi 264 hnenah loan pek chhuah tawh a ni. Loan hi Mizoram Rural Bank (MRB) ten pe chhuak tam berin mi 189 hnenah a pe chhuak tawh a, a dawttu chu State Bank of India (SBI) niin mi 47 hnenah a pechhuak tawh bawk a ni.

AMC in a chhinchhiah danin Aizawl khawpui chhungah hian street vendors 1826 an awm a, chung zinga 1644 te chu hmeichhia an ni.