Aizawl 25th January, 2022 : Vawiin khan Information & Public Relations leh Mizoram Art Development Society buatsaihin ni 4 chhung awh tur Art Workshop, ‘Colours of Mizoram’ 2022 Aizawl Art Gallery, MUP building, Khatla ah tan a ni.

‘Colours of Mizoram’ Art workshop hi Pi Lallianpuii, Director, I & PR chuan vawiin khan a hawng a. Thu sawiin hun hmalamah workshop leh exhibition te online in neih thin a ni a, tun tumah erawh chuan mi thlan bik tlemte te tan offline in Art Workshop hi buatsaih a ni a. Workshop a tel te chu sawrkar SOP tha taka zawm chunga a tawp thlenga hun hmang turin kan in buatsaih a ngai a ni, a ti a. An thiam thil ropui tak chu mi nazawng in an neih ve loh a nih avangin thil mawi leh suangtuahna hmuh theih a phochhuak thiam te an ni tih in hre thar leh a, an tih thinte ngaia neih mai lova rilru thar nena thil thar chhawpchhuak theuh turin a chah a ni.

Pu Laltanpuia, President, MADS chuan department in an hmakhua ngaia workshop leh exhibition te hun harsa tak kara a buatsaih thin chu lawmawm a tih thu a sawi a. Artiste te chu inthlahdah lova hmala chho zel turin a chah a ni.

Pu Vanlalhriata, Gen. Secretary, MADS chuan inkhawm hi a kaihruai a ni.

Tun tuma Art Workshop ah hian MADS member 23 thlan an ni a. Workshop chhunga an hmanrua tur board leh paint te semna hun neih nghal a ni.