Vawiin khan Chief Minister Pu Lal Thanhawla chuan Serchhip DC Conference Hall-ah NLUP 3rd leh 4th Phase hnuaia Ar Vulh Thlangtute hman tur ruahmanna thar 'Integrated Management System (Kelkang Model) for Poultry for 3rd & 4th Phase NLUP' tih chu beneficiary ten hlawk zawka ar vulh nana a an kalpui theih turin a tlangzarh a ni.

Chief Minister Pu Lal Thanhawla chuan hun kal tawh leh hun kal mekah hian ram in a mamawh ang zel programme leh policy te pek in kan awm a, ram hmasawnna leh hnam ropuina atana Pathian lamtang programme leh policy hruaitu ten an ngaihtuah chhuak thin a, chungte chu Pathianin nasa taka malsawmin, a kaihhruaina duhawm tak hmuin, hlawhtlinna kan chang chho thin hi a ropui a, hemi avang hian lawmnachang kan hriat a pawimawh hle a ni, a ti.

NLUP chu Pathian lamtang programme a nih dan chanchin te sawiin a hlawhtlinna erawh a dawngtute kutah a innghat a, chuvangin rinawmna, dikna, taimakna leh Pathian tihna nen dawn a tul a, chutianga hma kan lak chuan hlawhtlinna kan chan ngei ka beisei a ni,  a ti. NLUP hi kum 5 atana tih a nih angin tang leh tanpui duh avangin leh ei tawk tawk economy atanga hralhchhuah tur nei market economy a Mizoram hi hlangkai turin NLUP chhunzawmna atana New Economic Development Programme chu duan leh hman mek a nih thu a sawi.

Rambuai laiin remna leh muanna policy neiin theihtawp kan chhuah a, remna leh muanna kan neih hnuin eizawnna kawng tinrengah mipui kan harsat avangin eizawnna kawng ngelnghet siamna tur policy  neiin kan kalpui a, khata thawkrim taka hmalate chu mi hlawhtling an ni a, tuna NLUP dawngtu te pawhin hlawhtlinna hi in kutah a innghat a ni tih in hriat a, theitawp chhuah nachang in hriat hi a pawimawh takzet a ni, a ti.  NLUP ah hian tunlai khawvel in a buaipui mek sik leh sa inthlak danglam te, tui hna kangchat leh khaw lum zel chhanna te hi mithiam ten an hmuh vangin UNO leh Minnesota University te nen thawhhona tha tak kan nei a, NLUP ah hian Pathian Nung kut a lang a, NLUP hi Pathianin kan hnam khaichhuahna tur atan min pek a ni, a ti.

Kelkang Harhna chungchangah Chief Minsiter chuan he Harhna hian Thlarau lama harhna a thlen bakah tisa lamah malsawnna a thlen kan duh a, chuvangin kan ngaituahnate hmangin tui tlanna a ni emaw, kalkawng a ni emaw, eizawnna kawng a ni emaw, kan theih ang angin hma kan lak a, Kelkang hming chawi a, Kelkanga hlawhtling taka hman tawh, he ruahmanna Mizoram pumah hman a nih theih nan a vawiina kan tlangzarh hi Pathian ropuina a ni a, a ropuina atan kan hman theuh hi a pawimawh a chuvangin vawiina he hamthatna dawngtu te hi theihtawp chhuaha hlawhtling ngei tura tanla turin ka duh che u ni, a  ti.  Pathian hnathawh ropui dan leh a mak dan te hi hriat nawm fo a that thu a sawi bawk.

Mizoram Sawrkarin kawng hrang hrangin Mizoram hi khawvel hriata phochhuahna kawnga hma a lak dante sawiin kuttling lova sum lak pawisak lohna, sum ngainatna  leh duhamna ten hmasawnna than an ti thu a. A berkankaina thenkhat - cancer leh HIV/AIDS te hi a chhuanawm lova, inbihchian nachangkanhriata insiamthatna kawngkanzawn hi tul a, vawiinakanmamawh ber chu moral reformation a niin ka hria a ti bawk.

He programme hmanpuitu dang NLUP Implementing Board Chairman Pu J. H. Rothuama chuan NLUP hi hleih neih lova kalpui a nih thu te, ram in a mamawh phuhru tura kalpui a nih thu te leh mipuiina an hlawkpui thu te a sawi.

Programme hi Serchhip DC, Dr. Lalrozama, IAS in a kaihruai a, Upa Chawngthanga, Secretary, Kelkang Revival Committee in hunserh a hmang a. Pu James Lalrinchhana, Secretary, NLUP Implementing Board in Kelkang Model danglamna  te sawiin hun hmang a. Kelkang, VCP Pu T. Lalengliana’n Kelkanga ar vulh an kalpui dante sawiin hun a hmang a. Dr. Saingura Sailo, Director, AH & Vety Department in Poultry Farming hlawhtlin te sawiin hun a hmang bawk a ni.

Kelkang Model ah hian ar vulhtute hi vawi leh khatah an ar note dawn tur pe vek lovin vawi thum (3) a pek an ni dawn a. Vawiin hian beneficiary 101 te hnenah ar note 100 zel pek a ni a. A chaw chi thum bakah tui in na leh tui dahkhawlna te pawh pek tel an ni bawk.

Kelkanga he model kalpui te hi an zavaiin an hlawhtling vek a ni.