Vawiin khan Chief Minister Pu Lal Thanhawla'n Govt. High School Field, Zarkawt ah NLUP 3rd Phase hnuaia Commerce & Industries Department in NLUP beneficiaries 70 te hnenah Auto Rickshaw hlanna programme an buatsaih a hmanpui a. He programme ah hian Commerce & Industries Minister Pu H. Rohluna te bakah Parliamentary Secretary te, MLA te leh Sawrkar mi pawimawh engemaw zat an tel a ni.

Chief Minister leh NLUP Apex Board Chairman ni bawk Pu Lal Thanhawla chuan sawichhiatna leh elrelna karah pawh NLUP a hlawhtling chho zel leh a dawngtu hlawhtlingpui tam tak an awm mek thusawiin kan Sawrkar chhung hian NLUP hi kan chhunzawm zel dawn a ni, a ti a. NLUP hian chhungkaw tam tak tuam tawh mahse rahbi tleu chhungkua engemaw zat an la awm thu te leh dawngdah avanga hlawhtling lo te leh tan nachang hriate an la awm thu sawiin heng mite leh Mizoram hmasawnna zel tur ngaituahin policy thar New Economic Development Policy (NEDP) chu duan anih tih a sawi.

NLUP hlawhtlinna chhan chu Pathian lamtang programme a nih avang anih thu sawiin  kut hnathawktu, loneitu leh huan neitute hlawhtlinna pawh kan hmu chho mek a ni, a ti a. Ei leh bar, sum leh pai a kan intodelha, khawtlang nun kan siamthat a, Kohhran nun kan tihngheh chhoh zel chuan Pathian kan chawimawi a, chuvangin Pathianin min hun na theuh hi A rawngbawl tur leh mite tana malsawmna ni tura min dahna a ni tih kan hriat thar a pawimawh hle a ni, a ti a. NLUP dawngte hi a hlawhtlinpui lo zawnga kalpui an awm chuan chu chu a vanduaithlak hle a ni, a ti.

Pu Lal Thanhawla chuan Industries Department hnuaia Auto Rickshaw Trade, Petty Trade, Puanthui Trade leh Trade dangte hi thlai leh Trade dangte ang a nghah ngai a ni lova , ei zawnna tling nghal leh eizawn nan a hman theih nghal a ni a, beneficiaries ten rim taka an thawh chuan hun reilo te chhunga a hlawhtlinna rah an seng nghal theih a ni, a ti a. 1st Phase leh 2nd Phase a Auto Rickshaw dawng beneficiaries ten rinawmna, taimakna, dikna leh Pathian tihna nung nen hma an lak avangin hlawhtlinna an hmuh thu Chief Minister hian a sawi a. Chief Minister chuan tun tuma Auto Rickshaw dawngtu NLUP beneficiaries 70 te chu hlawhtling tura a duhsakna hlanin, an chhungkaw dinhmun siam tha a, eizawnna ngelnghet an hmuhna piah bakah an khawtlang theuh a, a mamawhtu leh khawtlang tan malsawmna ni tura chahin beneficaries dangte tan entawntlak ni turin a fuih a. Auto rickshaw dawngtu te chu an mahni in an khalh emaw, midang an chhawr emaw, motor khalhtu te hi hnam darthlalang an ni tih hriaa hawihhawm leh rinawm takin an passenger-te dawngsawng thiam turin a chah bawk a ni.

Chief Minister hian Cluster 9 atanga beneficiaries pakhat theuh hnenah Auto Rickshaw document leh chabi a hlan nghal bawk a ni.

Programme kaihruaitu Commerce & Industries Minister Pu H. Rohluna chuan Auto Rickhaw Trade hi NLUP Trade tam tak zinga a hlawhtling pawl ber nia a hriat thu sawiin Trade dangte angin nghah a ngai lova, taima leh rim taka thawk NLUP 1st leh 2nd Phase Auto dawngtu thenkhat te chuan Auto atanga an hlawhchhuah atangin motor lian zawk lei an awm thu te a sawi a. Beneficiaries ten Auto an dawn hi dimdawi leh duat taka enkawl tura chahin dinchhuahpui nana hmanga, an chhungkua thlamuanpuitu ni turin a fuih bawk a ni.

Vawiina NLUP 3rd Phase hnuaia, Commerce & Industries Department in Auto Rickshaw semna programme an buatsaih hi Pu H. Rohluna, Commerce & Industries changtu Minister in kaihruaiin Commerce & Industries Department, Director, Pu J. Hmingthanmawia hnen atangin Technical Report ngaihthlak a ni a. Commissioner, Commerce & Industries Department Pu Zothan Khuma’n lawmthu sawiin programme kharna hun a hmang a ni.

Vawiina NLUP kaltlanga Auto Rickshaw dawngtu te hi Commerce & Industries Department hnuaia NLUP 3rd Phase a beneficiaries  niin an zavaiin mi 70 an ni a. Cluster 9 a mi niin Tuichang Cluster atangin beneficiaries 5; Lengteng Cluster atangin beneficiaries 10; East Tuipui Cluster atangin beneficiaries 8; Champhai North Cluster atangin beneficiaries 7 ; Champhai South Cluster atangin beneficiaries 10; Kolasib Cluster atangin beneficiaries 8; Tuirial Cluster atangin beneficiaries 6; Serlui Cluster atangin beneficiaries 10 leh Hrangturzo Cluster atangin beneficiaries 6 in Auto Rickshaw hi an dawng a ni. Auto Rickshaw pakhat man hi cheng 1,27,695 niin Bajaj Companysiam2 stroke, 150 cc category a ni a, a supply tu hi M/S Standard Motor Works, Aizawl an ni.

NLUP hnuaiah Auto Rickshaw Trade thlangtu 1st Phase beneficiaries 69 leh 2nd Phase a beneficiaries 196 ten Auto Rickshaw an dawng tawh a. Tun tum nen hian 3rd Phase ah hian beneficiaries 135 te chu Auto hi an dawng tawh a, nakina lawka beneficiaries 58 te hi Auto hlan turah ruahmanna siam a ni leh dawn a. 4th Phase ah hian beneficiaries 100 in Auto an la dawng leh dawn a ni.

Mizoram Sawrkar Flagship programme NLUP ah hian Industries Sector hnuaiah hian main trade 24 leh minor trade 40 zet dah a ni a, NLUP Phase hrang hrang hnuaiah beneficiaries 26914 an awm mek a ni.