Chief Minister Pu Zoramthanga chuan vawiin khan Parking House Support Scheme (PAHOSS) hnuaia beneficiary thlanchhuah batch hmasa ber mi 99 hnenah pawmpuina lehkha, Approval Letter a hlan. Vawiina Approval letter semchhuah hian sawrkar atanga Parking House sakna tura puih tiamna entirin, 1st batch atana tanpuina pek tur zat hi a vaiin cheng nuai 1,746 a ni. PAHOSS hi Aizawl khawpui AMC area chhunga traffic jam tiziaawm tura hmalakna niin, PAHOSS beneficiary te hian an in sak sa emaw sak lai mek leh la sak turte emaw, man chawia vantlang motor park-na atan an buatsaih dawn a. Vawiin programme, Vanapa Hall-a UD&PA Department in a buatsaihah hian Speaker, Minister leh MLA te an tel thahnem hle a ni.

Chief Minister chuan Aizawl khawpui chu State capital traffic jam awmlohna ah siam tum a nih thu sawiin, PAHOSS chu a bul tanna chauh a nih thu leh hmalakna dawng pawh siam belh zel tum a nih thu a sawi. State dangte tan a entawn tura hma la in, India hmarchhakah Mizoram chu hmahruaitu kan ni thei a ni, a ti. Ram lo thang zelah traffic jam chuan nitin nunphung a tihbuai tak avangin ngaihpawimawh hmasak a nih loh theih loh thu Chief Minister chuan a sawi a, PAHOSS chu tlangzarh a nih atangin hun reilote chhungin ngaihventu a hlawh nasat thu leh diltu an thahnem thu a sawi a. Khawtlang pum tana thatna tur lam hawi a nih bakah Parking House atana in leh lo nei remchang te tan hlei hlei a hlawkthlak tur thu Chief Minister chuan a sawi a. Sum lalut tura in sak rau rau ah parking house chu senso a ngaih tlem zawk thu te leh PAHOSS inkaihhruaina pawhin a duh khirh loh thu te a tarlang a. Parking fee lah parking house neituten a vaiin an hui vek theih leh zel dawn avangin khua reiah phei chuan an hlawk zual zel tur thu a sawi. Chief Minister chuan PAHOSS chu Aizawl ah chauh nilovin district capital dangah te pawh a remchan dan ang zela kalpui theih dan ngaihtuah a nih tur thu a sawi bawk.

Chief Minister chuan ram hmasawnna chu a chhunga chengte hmalak duh danah leh an rilru puthmangah a innghah thu sawiin, Mizoramin hmasawn tura asset a neih that thu leh mipuiin kan hman thiam a hmanchang leh remhriatna kan neih a pawimawh a ti. Sawrkar hmalakna pui SEDP chu sum hlawma sem tumna nilovin thawh tur intuk a chumi atan hmanrua intum sak leh hmalak dan tur inhrilh te a ken tel thu a sawi a. Pu Zoramthanga chuan Mizo mipuite chu inhlawh/Employee chauh tur nilovin eizawnna siamtu, midang tana inhlawhna siamtu Employer zawk ni turin kan ram hi kan siam a ngai a ni, a ti a. Hmasawn tura hmalakna te hi mi zawng zawng kil phak tura kalpui tum a nih thu a sawi bawk.

Vawiin Parking House Support Scheme programme hi Chief Secretary Pu Lalnunmawia Chuaungo, PAHOSS Executive Committee Chairman ni bawk chuan a kaihruai a. UD&PA Secretary Dr. C. Vanlalramsanga, Parking House Committee Member Secretary chuan PAHOSS inkaihhruaina leh a chanchin tlangpui report pe in, Chief Minister leh Assembly House Speaker Pu Lalrinliana Sailo te chuan heng PAHOSS beneficiary batch hmasa ber mi 99 te hnenah hian approval letter sem. Hun hi Pu P.C. Lalhmingthanga, Mayor, Aizawl Municipal Corporation chuan lawmthu sawiin a khar a ni.

Parking House Committee hi Chief Minister kaihhruaina hnuaia din a ni a. Ngun taka ngaihtuahna hman a nih hnu ah mimal emaw, pawl angin emaw, motor park theihna hmun siam thei (A tlem berah LMV 5 tal park theih) hnenah Sorkarin tanpuina, motor pakhat zel parkna hmun ruahman turin Rs 1,00,000/- tanpuina pek theihna Scheme siamchhuah a ni ta a. A scheme hming atan ‘PARKING HOUSE SUPPORT SCHEME (PAHOSS)’ vuah a ni a. PAHOSS hi ni 6th February, 2019 khan Chief Minister in a hawng a. Parking House siamna senso leh puihna atan sawrkar atangin motor pakhat (LMV) ah emaw 2-wheeler paruk zelah tanpuina cheng nuai khat (1 lakhs) a neitute hian an dawng a. Tanpuina dawngtute hian a tlem berah kum 10 chhung tal Public parking atan an hmang ngei tur a ni. Tun tum PAHOSS 1st Batch atan hian dilna 563 lut in, dilna 338 enfiah tawh zingah 99 te chu thlanchhuah an ni. Parking House 99 approve atana sawrkarin Rs. 1,746 lakhs a sanction turah hian LMV 1746 park theihna  ruahman a ni dawn a. Diltute hi a tahtawlin enfiah thin niin an hmalak that dan azirin pawisa pawh pek chhunzawm zel an ni ang.

PAHOSS atan hian Mizoram sawrkawrin kum 2018-19 budget ah Rs 1000 lakhs dah a ni a. Kum 2019 2020 budget ah Rs 6000 lakhs a dah leh bawk.

PAHOSS hnuaia hmalak duh, hmunhma nei tha te tana a dil theih nghal turin PAHOSS scheme guidelines fel tak duan nghal a ni a. UD&PA Department hi Nodal Department a nih angin application form mumal tak Office ah lak nghal mai theih a ni. A Scheme kalpui dan tur kimchang tarlanna guidelines pawh UD&PA website-ah a duh apiang tana download theih turin upload a ni bawk. (udpamizoram.nic.in/PAHOSS.html)

He scheme hian motor park-na tur insak thar mai bakah kawngpui dunga in nei, Parking atana let duh tan dil theih a ni. Aizawl khawpui chhunga traffic jam nasat zualna ah priority pek a ni a. A tul angin priority area siam thin a ni. He scheme hmang hian Aizawl Traffic Jam nasa zual tihreh theih ngei beisei a ni.

Parking House Committee hi vawi thum (3) a thu tawh a, Executive Committee Meeting of PAHOSS hi vawi li (4) a thu tawh bawk a. Parking House Committee ah hian Chairman Chief Minister leh Member Secretary UD&PA Secretary bakah member dangte chu UD&PA Minister, Chief Secretary, AMC Mayor, Finance Department Secretary, DGP, PWD E-in-C te an ni. Parking Home Committee hi he scheme atam hian apex decision making body a ni.

He Scheme hi chak taka kalpui turin Chief Secretary kaihhruaina hnuaiah Executive Committee pawh din a ni bawk a. UD&PA Director chu Member Secretary niin, member dangte chu UD&PA Secretary, Finance Department Secretary, AMC Vice-Chairmna (Parking), IGP (Law & Order), PWD CE (Building), Transport Director leh SP (Traffic) Aizawl te an ni. PAHOSS hnuaiah hian application dawn apiangte preliminary – verification tih niin, Verification team-ah hian UD&PA Department, Traffic Police leh Local Council aiaawhte an tel a

Attachment

  • Loading attachment...