Vawiin chawhnu khan Tlungvel Higher Secondary School chuan kumin HSSLC Examination a an tih that lawmna hun an hmang a, he hun hi Pu Lalchhandama Ralte, School Education Minister-in khuallian niin a hmanpui.

Khuallian chuan Tlungvel Higher Secondary School chu kum 9 chhunga tum ruk lai HSSLC Result zaa 100 passed thei School an nih avangin chhuanawm a tih thu leh a lawmpui takzet thu a sawi a, zirlaite pawh result tha tak nei thei tura an thawhrimnaah a lawmpui thu a sawi. Zirlai passed tharte chu zirna sang zawk an kai hunah uniform-te ha lova College an dai tawh dawn avangin an zalenna hmang thiam turin a fuih a, Nu leh paten beka thlantui luang zawih zawiha an thawhchhuahsa hmanga zir an ni tih inhriaa chhawr tlak ni ngei tura thawkrim turin a chah bawk a ni.

Sorkar tharin thla 6 hmel a hmu chauh chungin Election Model Code of Conduct avangin thla thum vel chauh a taka hna thawh theih a ni a, hemi chhung hian sorkarin zirna a ngaih pawimawh avangin Education Department hnuaiah hmasawnna engemawzat hmuh tur a awm a, Elementary Education bika kan tlakhniamna laite tiziaawm turin Primary School leh Middle School zirtirtu sang khat (1000) vel Muster Roll-a lak tum a ni a, hei bakah hian IVth Grade(Muster Roll) 54 la turin hma lak mek a ni bawk a, heng hna lak hrang hrangte hi dik tak leh fel fai taka lak tum a nih thute Minister chuan sawiin Sorkar School hrang hrang tla chhe deuh tawh nia sawite pawh tih hmasawn tumin tuai thar mek a nih thu a sawi bawk.

Tuikum bialtu MLA Er. Lalrinawma pawhin thu sawiin zirlai passed tharte chu rahbi thar kai tur an nih avangin nun uluk taka hmanga zirlai an nih anga an mawhphurhna hlen turin a fuih a ni.

Tlungvel Higher Secondary School hi kum 2010 khan din tan niin Arts Stream chauh hawn a la ni rih a, nikum 2018 khan Lumpsum Aided-ah dah a ni a, a din tirh atangin kum tin HSSLC Examination candidate engemawzat a nei ziah a, kum 2010-2011 atanga 2018-2019 thleng khan zirlai 192 in HSSLC hi exam tawhin heng zinga 190, zaa 98.96 in an passed a, kumin pawh hian Candidate 25 awmin an passed vek a ni. Tunah hian zirlai 63 leh thawktu Teaching Staff 6 leh Non-Teaching Staff 1 an awm mek a ni.