Vawiin khan DC Conference Hall, Mamit-ah Dr. Lalrozama, IAS, District Bawrhsap kaihhruainain Reang (Bru) Tripura Transit Camp-a awmte laklet an nih huna hmalak dan tur Mamit District huam chhunga Village Council President-te ko khawmin inrawnkhawmna neih a ni.

Meeting kaihruaitu District Bawrhsap chuan Reang (Bru) tuna Tripura Transit Camp-a awmte chu a tam zawk kan District atanga chhuak an nih angin a hruai let leh chu kan mawhphurhna a ni a. Kan District mi leh sate chu kan District chhungah ngei dah an nih theih nan hmalakpui turin kalkhawmte chu a sawm nghal bawk.

Meeting rawn telpuitu Pi Lalbiaksangi, Jt.Secretary, Home Department, Govt of Mizoram chuan Village Council Members-te chu an khua leh veng chhunga NGO hrang hrangte nen inrawnkhawm a, an Village Council huamchhungah a tam thei ang ber Bru lo let turte chu dah an nih theih nan ruahmanna nei tura a duh thu a sawi a. Bru laklet an nih huna an ram theh chungchangah pawh an Village Council Area depa Forest Reserve leh Riverine-te chu khawih che lo tur leh an thuneihna huamchhung ami a ni lo tih hrerenga fimkhur turin a chah.

Meeting-ah hian Bru, Tripura Transit Camp-a awmte lokir huna an Village Council huamchhung theuha In hmun an sahthlak theih dan tur sawiho a ni a. Hun hmasa lama In hmun an lo ruahmansak tawhte chu harsatna hrang hrang In dang thar, pem thar bakah huan lo ram siam nana hmangte an awm tak nual avangin a hma aiin an khua theuhah In hmun sahthlak tur a tlem tawh thu VCP-te hian an sawi a ni.

Vawiin Meeting-ah hian Mamit District huamchhunga VCP emaw an aiawhte, Mamit District Village Council Association President bakah DFO, DIPRO, SO, DLAO Mamit-te an tel a ni.