Vawiin khan Chief Minister Pu Lal Thanhawla'n Pachhunga University College in National Assessment and Accreditation Council (NAAC) Re-Accreditation Cycle thar bera A+ Grade an hmuh; kum 2015-2016 atana Indira Gandhi NSS National Award chi thum President Shri Pranab Mukherjee hnen atanga an dawn leh MZU Annual Sports Meet 2017 a Champion an nih  lawmna te  ‘PUC Grand Celebration’,  PUC Multi Complex Auditorium a an buatsaih chu khuallian niin a hmanpui.

Chief Minister Pu Lal Thanhawla chuan Pachhunga University College in NAAC Re- Accreditation ah Mizoram college te zinga grade sangber A+ an hmuh thei chu a lawmpui thu sawiin hei hi College Principal, zirtirtute leh zirlai te thawh rah a ni a ti a. Indira Gandhi NSS National Awards chi thum lai an dawng chu an chhuanawm tih sawiin hei hian Mizo zirtirtu leh zirlai te hi an duai bik lo va ni tih a ti lang a, an tum a ruh a theihtawp an chhuah tlan chuan midang an tluk theih lohna tur a awm lo nia a hriat thu a sawi.

A sawi zelnaah Chief Minister chuan amah ngei pawh Pachhunga University College chhuak anih thu sawiin Mizorama college tha ber hian mi tha leh tangkai thahnem tak a chherchhuak tawh a, he college zirlai leh zirtirtu hi in vannei a, Mizoramin in lakah beiseina sang tak a nei a ni, a ti a. Zirlai leh thalai te chu naktuk naktipa ram leh Kohhran hruaitu tur leh ram nghahfak an nih thu sawiin  mahse chutiang tling turin an nu leh pate thu an awi a, aia upa an zahthiam a, Mizo nun zemawi an vawnnun tlat a ngai a ni, a ti. PUC Campus chu Aizawl khawpui timawitu berte zinga ami niin a ngaw that avangin Khawpui Chhuap a tih theih a, Campus chhunga thing leh mau te chu humhalh turin zirtirtu leh zirlai te a chah a ni. Chanchin Tha hi kan mihring puite hnenah chauh nilo, thil siam chitin reng hnenah kan hrilh hian ram nuam tak kan siam thei a ni, a ti bawk.

Sawrkarin ei leh bar leh sum leh paia intodelha Mizoram chu khawvel hriata phochhuak turin theihtawp a chhuah mek thusawiin hemi atan hian thalai leh zirlai te in pawimawh a, thil tam tak hi in koah a innghat a ni, a ti. Zirlai leh zirtirtute chu Mizoram tan chhuan tlak ni tura fuihin, India rama college tha tak, Mizoram Univerity leh Mizoram ti ropuitu ni zel turin duhsakna a hlan a, hemi atan theihtawp chhuaha tan la tlang turin a chah bawk a ni.

MZU Vice Chancellor Prof. Lianzela pawh thusawiin chawimawina an dawn leh hlawhtlinna an hmuh chu a lawmpui tih a sawi a. Thusawitu dang College Principal Dr. Tawnenga chuan Mizoram mamawh ang zel leh Mizoramin a chhawr theih tur thiamna tak tak pawchhuak thei zirlai chherchhuah chu an tum ber a ni a ti.

 He hunah hian NAAC Accreditation, Indira Gandhi National NSS Award leh MZU Annual Sports Meet chungchanga Report-te tarlan  niin College tobul leh tuna a dinhmun te pawh tarlan a ni bawk.

Pachhunga University College hi Aizawl mi thahnemngai ten August ni 15, 1958 a an din a ni a, a tirah chuan Aijal College tih a ni a, kum 1965 provincialised niin 1979 khan NEHU hnuaia Constituent College hmasa ber a ni a, Mizoram University kutah July 2001 khan hlan a ni. Tunah hian zirlai 2000 chuang an awm mek a, zirtirtu nghet 104 leh thawktu dang 97 an awm bawk a ni.