Chief Minister Pu Lal Thanhawla chuan vawiin khan New Delhi chhuahsanin Pune a thleng a. Pune ah hian vawiin tlai dar 4 hian Pune Mizo Welfare Association buatsaih Chapchar Kut a hmanpui ang.

Chief Minister hian vawiin chawhma khan Cosmos Bank Head Office chu an Chairman sawmna ngaipawimawhin a tlawh a. He Bank hotute chuan Mizoramah pawh branch hawn an duh thu hrilhin, an bank chu Multi State Scheduled Bank anih thu leh state 4 ah branch 300 vel an neih thu Chief Minister hi an hrilh a ni.

Chief Minister hian Union Biblical Seminary (UBS) tlawh bawkin thusawina hun a hmang bawk a. Mizote hi khawvela sakhaw lian ber ber pathum Hinduism, Buddism leh Islam ten min hual tlat chungin Pathianin A Chanchintha India ram leh ram danga puang darh tura min duh avangin min rawn zawng chhuak a ni a ti a. Chuvangin kan awmna hmun apiang hi Ama rawngbawl tura min dahna a ni a, A hnungzuitu rinawm tak englai pawhin kan ni tur a ni a ti.