Vawiin chawhnu khan Chief Minister Pu Lal Thanhawla chuan ‘Rambuai Mizoram’s Trouble Years’ tih documentary film, Sanjoy Hazarika leh Preeti Gill, Centre for North East Studies and Policy Research (C-NES) leh Prof. Margaret Zama, Mizoram University leh Dr. C. Lalawmpuia Vanchiau ten rambuai laia Mizo ziakmi te kutchhuak leh an sulhnu te chhuina lehkhabu buatsaih ‘After Decades of Silence: Voices from Mizoram’ tih te chu a tlangzarh a. He programme ah hian Finance Minister Pu Lalsawta pawh a tel a ni.

Chief Minister Pu Lal Thanhawla chuan Mizoram leh Mizo ten hun hrehawm leh khirh tak kan tawh leh tawn Rambuai chungchangah a vawikhatna atana Sap tawngin documentary film siam a nih chu tha a tih thu sawiin hetiang film leh documentary te hi thangthar leh midangte pawhin hei aia phuisui leh tha zawka an la siam ka beisei a ni, a ti a. Rambuai khan Mizo nun kawng tin rengin a nghawng a, hun kan sawi dan, Rambuai hma leh Rambuai hnu tia hun kan sawi fo dan te hian kan rilru leh ngaihtuahna Rambuai in nghawng a neih nasat zia a tilang a khatih hunlai khan kan nunphung kha kawng tin rengin tihdanglam in a awm a. Khatih hun laia Sipai ten AFSPA nghenchhana mipui, hmeichhia leh nunau te chunga rawng taka an chet dan kha a demawmin a lungchhiat thlak a ni, a ti a. He film a, Gen. VP Malik’n Khawkhawm khan awmzia a nei lova, mipui tan tawrhna, harsatna leh hrehawmna bak a thlen lo a ni a tih kha thudik a ni tiin Mizorama Rambuai laia dan hman AFSPA tunah Manipur a hman mek hlih anih thei nana Irom Sharmila in kum 16 chuang chaw nghei theihtawp a chhuahna hi a fakawm a ni, a ti a .Rambuai leh hun kalta te hi thangthar ten an hriat a pawimawh thu sawi langin tunah thangthar te hian hun liam tawh chanchin te hi dik taka an hriat a pawimawh tul a tih thu a sawi bawk a ni.

Film leh Lekhabu tlangzarhna ah hian he film siam anih theih nana tanpuitu Henrich Boll Stiftung aiawh Pu Chok Tsering chuan thuhmahruai sawiin, Pu LR Sailo, Press Secretary to Chief Minister chuan Sanjay Hazarika chanchin sawiin inlawm thu a sawi a. Film siamtu Sanjay Hazarika in film an siam leh buatsaih choh dan chanchin sawiin Rambuai laia mipuiin harsatna leh hrehawmna an tawrh dante pholan chhuah tum a nih thu te a sawi a. Prof. Margaret Ch. Zama in ‘After Decades of Silence: Voices from Mizoram’ an buatsaih dan te a sawi bawk a ni.

He film hian Mizoram - India ram hmun mawi taka innghirngho leh rambuai hun chhung kumte bakah remna leh muanna a lo awm theihna atana rilru sukthlek a lo danglam chhoh dante, lungrual a kal thei tura mipuite nawr kaltu leh hmabak tihtur la awmte pawh a tarlang tel a. A taka rambuai hre ve phalo, chhungten an hrilh chhawn kum lama la naupang zawkte pawh awka a neih tir a. Engtiangin nge mipui mimir zingah an thiltawn avanga harsatna an hmachhawn leh paltlang tur an neih chungchangah zawhnate a siam a. He Film hian tharum thawhnain nghawng a neih dante huapzo takin a pholang a, kawng hrang hrangin remna leh muannate thlirin zawhna langsar leh pawimawh chhan lova la awmte a tarlang bawk a ni.

He film hi Heinrich Boll Stiftung(HBF), New Delhi puihna a siam a ni a. HBF hian sik leh sa, leilung hausakna, hmeichhia/mipa kaihhnawih socio-economic policy leh mipui rorelna chungchangte a thlurbing thin a. Hei bakah hian ramngaw humhalh hmalakna zau tak tichak tura khawvel pumhuapa India ram hmalaknate tawiawmin rampum huap leh khawvel zau zawk thleng a thawhhona chungchangahte hma a la a ni.