Nimin khan Chief Minister Pu Lal Thanhawla chuan Rawpuichhip Kum Za tlin lawmna atan vantlang inkhawm leh Centenary puala programme Rawpuichhip Centenery Organizing Committee in an Community Hall-a an  buatsaihah khuallian niin a hmanpui . Centanary lawmna puala vantlang inkhawm hi Chief Minister nupui Pi Lal Riliani leh Deputy Speaker leh bialtu MLA ni bawk Pu John Rotluangliana ten an tawiawm a ni.

Chief Minister hian Rawpuichhip a thlenin, Rawpuichhip Kum Za tlin hriatrengna lungphun an phum chu a hawng nghal a. Hemi hnu hian Chief Minister leh Centenary hmang tura kalte chu YMA, MUP leh MHIP Branch ten Cheraw, Chheih Lam leh Siktuithiang-te entirin an lo lawm a. Hemi zawh hian Centenary puala vantlang inkhawm Community Hall-ah neih leh nghal a ni a, he hun hi Pu Chhuanvawra’n kaihruaiin Pastor Gospel Thanmawia’n hunserh a hmang a ni.  
 
Chief Minister chuan Rawpuichhip khua in kum za a tling chu khaw mipuite a lawmpuina leh duhsakna hlanin Rawpuichhip chu state thenawm kalpawhna kawngpui in a paltlang avangin hun kal mek leh kal chho zel turah zin veivak miten an tlawh tam chho dawn a, chuvangin hriselna, faina, taimakna  leh intodelhna kawngah te, khaw dang leh khawpui tan entawntlak ni turin mipui te a chah a.  Pu Lal Thanhawla chuan hmui ringawt a Ringtu ni lova, mahni nun theuh leh a taka Ringtu nih a pawimawh thu te, in ennawn fo thin leh in chhut let a tul thu te a sawi bawk a ni.  
 
Sorkar chu mipui ta anih thu sawiin  Pu Lal Thanhawla chuan Sorkar-in rorelna dik, tha leh fel a awm zel theih nan theitawp chhuahin tan a la chho mek a, mipui lamin heng kawngah te hian Sorkar chawmdawl a ngai a,  tih tur leh mawhphurna  hlenchhuah tur an nei ve a ni, a ti. Sorkar-in  mirethei te, loneimi te, kuthnathawktute leh inhlawhfa a eizawng ten eizawnna ngelnghet leh rintlak an neih theih nan NLUP changtlung zawk a kalpui thu a sawi a. A dawngtu chhungkua ten NLUP tanpuina an dawn chu rinna, dikna, taimakna leh Pathian tihna nen malsawmnaah chan tira, an hlawhtlin ngei a beisei thu Chief Minister chuan a sawi.

He hunah hian Assembly Deputy Speaker leh Bialtu MLA  nibawk Pu John Rotluangliana chuan Centenary  puala Souvenir,  Organizing Committee ten an buatsaih chu a tlanzarh a. Pu John Rotluangliana chuan thu sawiin NLUP chu Mizo mipui huapa hmasawnna Project a ni a, Sorkar-in bultanna sum pein, chhungkaw tinte sumpai dinhmun siamthat a tum a ni, a ti.  Thalai ten an nu leh pate NLUP trade an  thlanah te tawiawm zel turin leh theitawp chhuah a pui turin a chah  bawk a ni.

Rawpuichhip VCP Pu Rohminthanga chuan Centenary Organizing Committee aiawhin Chief Minister Relief Fund atan Rs. 5000/- Chief Minister a hlan a. Hetiang bawk hian Rawpuichhip khaw dintu te – Pu Khianga leh Pu Zakaia thlah ten CM Relief Fund atan Rs. 2000/- an hlan bawk a ni.

Attachment

  • Loading attachment...