12.9. 1998 a Pu Lal Thanhawla, hetih hunlaia Chief Minister-in lungphum a lo phum tawh, Tuirial Hydel Project, MW 60 pechhuak tura ruahman kum 2004  compensation leh thil dang dang avanga hlamchhiah tak chu kumin kumtir lam atang khan NEEPCO chuan tharthawh lehin thawh mek a ni a, hei hi Mizoram Journalist Association chuan 18.11.2011 khan a hmunah kalin an en.

NEEPCO ten contractor tura an thlan PATEL Engineering Ltd. General Manager leh a hote chuan MJA leh official kalte hi lo dawngsawngin, hnathawh mekte leh hnathawh zawh tawh awm sa an fan pui. Diversion Tunnel (leiverh) pahnih 782 Metres  a sei an siam mek ah te luhpuiin MJA te nen inkawmna hun tha tak an nei a ni.

PATEL Engineering Ltd. General Manager, Pu Gard-an a sawi dan chuan Tuirial HP hi kumin April thla atang khan thar thawh leh a ni a, a thenfai fai hna tam tak a awm avangin hnathar thawh tak tak chu September 2011 khan an tan thei chauh tiin, diversion tunnel chu harsatna dangin a tlakbuak loh chuan January 2012 ah an verh tlang a beisei thu a sawi.

He Tuirial HP hian MW 60 pechhuak tura beisei a ni a, Mizoram chuan 12% power tharchhuah chu a thlawnin an chang ang a, a bak chu a mamawh danin a lei ve dawn a ni.

Central Sector Project anga thawh anih avangin Mizoram Power & Electricity Department chu an la in rawlh vak lova, PWD lamin Serlui B Mini Hydel Project peng thleng metal road an siam tawh bak chu kawng hi a la tha tehchiam lova, hna chak taka thawh anih theih nan Mizoram PWD in kawng tha tak siam thuai se an duh thu PATEL Engineering te chuan MJA te an hrilh.

MJA ten Tuirial HP an tlawhna buatsaihtu Power & Electricity Department leh Information & Public Relations Depattment lam hotuten MJA  Hqrs. President leh a thawhpuite hi an kalpui a ni.