Sports and Youth Services Minister Pu Zodintluanga chu 18th November 2011 Youth Affairs and Sports Ministers Conference, Vigyan Bhawan, New Delhi-ah a tel.

State Sports Minister Conference-a Ministers kalkhawm chuan resolution an siam a. An resolution-ah chuan ‘Central leh State school zawng zawnga level hrang hrangah games and sports kalpui vek ni rawh se. Subject dang ang bawkin games leh sports a an tihthat dan ang zelin an result teh ve ni se. Hei hian games leh sports-ah hmasawnna a thlen dawn a ni,’ tiin an pass a, Pu Ajay Maken, Minister os State (Independent Charge), Ministry of Youth Affairs and Sports-in a hming a ziahhnan a ni.

He conference-ah hian Minister chuan Mizoram mamawh hrang hrang a thlen a. India ram pumah state hrang hrangah sports infrastructure lamah rualkhai zawka an kal theihna turin Urban Sports Infrastructure Scheme hnuaiah State tinten kum khatah an state mamawh ang zela project pakhat an lak chhuah theihna turin a thlen a; a project neitu ram leilung mil ang zela pawh siksawi phal turin a thlen a ni. Minister Zodintluanga chuan National Sports Academy, Manipur-in an neih ang chi hi Mizoramah Sports School din a nih ve theihnan a thlen bawk a ni.

Thingtlang lama Central Ministry-in sports a kalpui PYKKA chungchang sawiin Minister chuan hmarchhak atang chuan veivahnaah harsatna tam tak an tawh thu leh phai aia motor-a veivahna pawh a to zawk avangin Ministry lamin national level sports kalna senso a puibawm (re-imburse) chu lawmawm a tih thu a sawi a. Thingtlang kilkhawra sports neihnaah harsatna tam zawk an tawh thu pawh tarlang nghalin Mizoram phei chu veivahna tur duh hun hunah hmuh theih a nih loh avanga maxi cab te hman a ngai thin chuan senso a ti sang lehzual a ni tiin Minister chuan local level a senso puibawm turin Minister hian ngenna a siam nghal a ni.

Minister Zodintluanga chuan Sport Authority of India (SAI) centre chungchang sawiin, Mizoram pumpui chawm turin SAI Common Area Games (CAG) pakhat chauh kan neih chu a tawk loh thu sawiin tuna SAI Sub-Centre a min hlankaisak turin thu a thlen bawk a ni.

The Right of Children to Free and Compulsory Education (RTE) Act, 2009 -in school zawng zawngah field, upper primary school-ah part-time physical instructor leh infiamna hmanruate pek a nih tur thu a sawi a.