654/2023-2024

Aizawl, June ni 1, 2023: Remna Ni pualin kumin June thla chhung hi Mizoram sawrkar hnuaia General Administration Department leh Association for Voluntary Blood Donation (AVBD) leh Central YMA tangho chuan thisen pek runpui an kalpui tan a. June thla hi Blood Donation Month ah puangin vawiin khan Dawrpui Multipurpose Hall ah he thisen pek runpui hawnna programme hi Chief Minister Pu Zoramthanga hovin hman a ni.

Chief Minister chuan Remna Ni puala vawiina thisek pek runpui hawn a ni ta chu midangte tan malsawmna nihna tur remchang hlu tak a nih thu a sawi a. Mizo mipui tana remna hlutzia sawiin, rambuai avanga tawrhna nasa tak ramin a tawh dan te leh hnam chhan nan a mi tam takin an nun an hlan dan te a sawi a. Chung mite inhlanna avanga vawiina remna leh muanna kan nei thei ta hi kan vawn him zel a pawimawh thu a sawi a. India hmarchhaka ram buai ber thin kha tunah muanawm bera kan chang ta hi Pathian kaihhruaina leh remruatna vek a ni a ti a. Hun khirh tak kan lo paltlang tawh khan hre rengin, midang tan remna thlentu kan nih ve a tul thu a sawi a. Remna hmachhuan tu te, nunna pe tute hre rengin, thisen pek hmangin anmahni chawimawina leh ngaihhlutna entir hi thil hlu tak a nih thu sawiin Chief Minister chuan thisen pek runpui neih chhung chuan a tam thei ang bera miin thisen an pek a beisei thu leh lawmawm a tih thu a sawi.

GAD Commissioner & Secretary Pu K. Lalthawmmawia pawhin remna hlut zia sawiin, rambuai avanga harsatna tam tak mipuiin an tawh dan leh remna neih hnu a nunphung in nasa taka hma a sawn chhoh dan te a sawi a. Remna leh muanna kan neih chu hlut nachang hria in, chawisan a vawn nun zel a pawimawh thu a sawi a. Kumin Remna Ni puala June thla chhungin sawrkar chuan department hrang hrang kaltlanga association leh society-te nen thawk hova intihsiakna leh exhibiton te buatsaih a nih tur thu a sawi a. Chung zingah chuan vawiina Blood Donation Month hawnna pawh hi a tel thu leh, hemi hun chhung hian a thei apiangin an thisen pe turin a sawm a ni.

CYMA President Pu R. Lalngheta chuan thisen pek pawimawhna thu sawiin, YMA chuan June thla chhung hian a tam thei ang bera thisen pek tumin an insaw thu a sawi a. Thisen pek chu taksa in a tuar phah loh thu te, thisen vawi tam lo pe tawh pawh an hrisel em em tho thu a sawi a. Chutihlai chuan pawn lam lan dan a mi pangngai tak, mahse ruihhlo leh an nun uluk loh avanga thisen pe tlaklo an awm thin chu pawi a tih thu a sawi a. Vawiin a naupang leh thalai kalkhawmte chu ruihhlo laka inthiarfihlim a, an nun uluk a invawng tlat tura chah in, mi harsa leh mangan chhan ngai an awm pawh a kan thisen avanga kan chhahchhuah theih nan ruihhlo lakah fihlim ang u tiin a sawm a ni.

Thisen pek runpui hawnna inkhawm hi AVBD President Pu C. Lalnunnema chuan a kaihruai a. Programme chhimtu high school zirlai thenkhat (kum 18 tling tawh) in thisen an pe nghal a ni. Remna Ni puala sawrkarin programme hrang hrang a ruahman zingah High school naupangte tan district tina quiz competition buatsaih te, Higher Seconary School zirlaite tan district tinah essay writing competition buatsaih te, I&PR Department kaltlanga Remna Ni thupui hmanga Painting leh Photo Exhibition neih te, Forest Department kaltlanga thingpui phun runpui neih te, UD&PA Department kaltlangin district headquarter ah zawng zawng faina beihpui thlak te, digital flyer and short video competition buatsaih leh a dangte a tel a ni. District thrnag hrnagah Blood Donation Drive hi nei turin hma lak zel a ni bawk.