Chief Minister Pu Lal Thanhawla chuan vawiin khan PAMRA (Peace Accord MNF Returnees' Association) buatsaihin Luangmualah Remna Run Lawi Hriatrengna lungphun hawnna inkhawm chu khuallian niin a hmanpui a. He inkhawmah hian Horticulture Minister Pu P.C. Lalthanliana chu khualzahawm niin, Revenue Minister Pu R. Romawia leh Cooperation Minister Pi Vanlalawmpuii Chawngthu te an tel bawk. 

Chief Minister chuan ram buaiin mipui tan harsatna hrehawm tak a thlen dan te, ei leh in tur, silh leh fen tura harsatna a thlen bakah khawtlang nun a ti derthawngin a tlakhniam phah thu te: Chutiang kara remna thuthlung ziak a nih a, India state ralmuang berte zing a mi Mizoram a ni ta chu lawmawm a tih thu a sawi a. Ram tana an nunna hial lo hlantute  hlutzia leh ral do tura chhuak lo kir lehte tuamhlawm chu a pawimawh thu a sawi bawk. Chief Minister chuan remna leh muanna rah chu tunah hian Mizoramin hmu chho zelin , state economy pawh India state lian  zawkte leh India pum huap chawhrual pawh tehna hrang hranga cho pha hialin hma a sawn tak thu a sawi a. Asia chhimchhak ramte nen indawrtawnna tha tak nei turin hmalakna ngawrh taka kalpui mek zel a nih thu te, Myanmar nen border trade neihna hmunpui siam a nih tawh ang bawka Bangladesh nen pawha border trade tihna hmunpui tuna buaipui mek a nih thu te tarlangin Chief Minister chuan remna leh muanna rah ei leh bara hmasawn tura hmalaknate hi chak zawka kalpui a, hman tangkai an nih theih nan mipui tanrual a pawimawh hle a ni, a ti.

Khualzahawm Minister Pu P.C Lalthanliana chuan "ramin zalenna a sual lai a ram tana a tih ve theih sang ber chu zalenna zualtute zinga pakhat nih ve kha a ni," a ti a. Rambuai laia mipui tawrhna a lo reh theih nana remna ziaktute chu fakawm a tih thu sawiin, vawiina lungphun phun chuan thang leh tharten PAMRA te thawhhlawkzia an hriat rengna hnam ro tling ni reng se a duh thu a sawi.

Remna Run Lawi champha pual a lungphun hawnna inkhawmah hian PAMRA hruaitute atangin report leh thusawi ngaihthlak a nih bakah zalenna sualtu boraltate sunna hun hman a ni a. ZORO leh MJA te bakah Mizoram political party, tlawmngai pawl leh zirlai pawl hrang hrang atang tein thusawi ngaihthlak a ni bawk. Lungphun hawn tak hi sawrkar sum pek leh pawl leh mimal thawhkhawm sum tlingkhawm atanga siam a ni.

Attachment

  • Loading attachment...