Lunglei khawpui chei mawina tura hmalakna thar Lunglei Town Beautification Committee chu vawiin chawhma khan a vawi khatna atan Lunglei DC Dr Ankita Chakravarty hovin a office chamber-ah an thukhawm.

Meeting-ah hian Lunglei khawpui a lo mawi a, a lo felfai zawk theihna tur kawng hrang hrang sawiho a ni a. Lunglei khawpuiin faina leh thianghlimna kawnga harsatna a tawh hrang hrangte sawi hovin, a chin fel dan tur leh Lunglei khawpui chei mawi tura hmalakna tur rawtna te siam a ni a. He hmalakna hnuaiah hian Lunglei kawpui dunga electric, TV leh telephone hrui inzam hnawk tam lutuk chu a zamtuten en fiah a, hrui tangkai lo paih leh a tul ang angte pawh felfai zawka zam a nih theih nan hmalak ni se, tih a ni a. He hmalakna hi Lunglei khawpui chhunga hmun laili leh lun ber Venglai ah tan ni se tih rel a ni bawk. Hemi bakah hian hmun remchang laia thing emaw pangpar emaw phun te, retaining wall thenfai leh rawng hnawih te, PHE pipeline enfiahte kalpui zel tum a ni bawk a. TV, chanchinbu leh social media kaltlanga inzirtirna a tam thei ang ber tihchhuah te pawh rel niin UD&PA Department kaihhruaina hnuaiah Lunglei Town Beautification Facebook Page siam tum a ni bawk.

Vawiin meeting-ah hian UD&PA, PWD, PHE, P&E, BSNL, I&PR leh DRDA hotute bakah YMA, MHIP leh MUP hruaitute an tel a ni.