Chief Minister Pu Lal Thanhawla chuan vawiin khan Aizawl Republic Vengthlang leh College veng inpawhna kawngpui, Biakin Road tia vuah, PWD siam chu Republic Vengthlang field bulah ribbon chep chatin a hawng.

Chief Minister chuan mipuite ta anih angin, hetiang thil lian tham lo a hawng chu veng mipuite nena inkawmna hun tha leh inhriattawnna hun pawimawh leh remchang a nih thin avangin hetiang hunah hian inthlahrunna leh timna awm lova kal zel a tum thu a sawi a. Kawngpui hian kohhran hrang 4 biakin a paltlang avangin veng tan leh thlarau lama hmasawnna rahbi pawimawh tak a nih ngei a beisei thu a sawi a. PWD kawng siam nimahse veng mipuite ta a ni a, a venhim hna leh enkawla vawnfai hna chu veng mipuite mawh a ni a ti. Chief Minister chuan thil tha hi dim angaih bik avangin mipuite chu thil tha neih tlina, dim thiam turin a chah bawk a ni.

Chief Minister chuan mipui ten a sorkarah beiseina sang tak an nei tih a hriat thu sawiin, sorkar hmasa in kum 10 chhunga an thawh theih loh kum 2 leh a chanve chhunga thawk zo tura an beisei chu an tlin bik lo a ni a ti a. A sorkar bul tum lian tak tak pathum, mirethei leh chanhaite chhanchhuah nana NLUP hman te, thalai te tana khawvel thar siamsak te leh eirukna leh hlemhletna tihbo te anih thu a sawi nawn a. NLUP sem mekah ala lungawithlak a ni a ti a.Thalaite tana zirna sang zawk IIMC te, NIT te, Medical college te Mizoramah ngei dah tum anih thu leh IIMC chu session tan mai tur anih thute a tarlang a. Hlemhletna tihbo na kawngahte ACB chu ti liana, IGP hnuaia dah a nih tawh thu te sawi nawn bawkin, hma a laknaah officer lian pension tawhte thlenga man an nih thu a sawilang bawk a ni.

Chief Minister chuan sum hi zawn chhuah chi anih loh thu sawi nawn bawkin, a thawha thawhchhuah chi a ni a ti a. NREGA kalpuina lamah sum chu a nghahin an nghak tawp tawh a ni a ti a. Mizote hian sim tur kan nei a, zir tur kan ngah hle a ni a ti.

Kawng hawn tak, PWD classificationa Village Road Standard hi Republic Vengthlang field bul atanga College Veng nena inri-na kawng kual thleng hi 650 metres a thui, 3.3 m a zau a ni a. PWD hian 6th February 2006 khan siam hna thawk tanin, blacktopping hi ni 9 April 2011 khan an zo a ni. Senso zawng zawng hi cheng nuai 56.11 a ni.Kawngpui hi mimal tlawmngai thahnem tak leh kohhran te ram pek avanga puitlin ta a ni.

Hawnna inkhawm hi Pu C.Hranglura, Local Council Chairman in a kaihruai a, Chief Minister hi a nupui Pi Lal Riliani leh bialtu MLA Pu K.Liantlinga ten an tawiawm a ni.

Hawnna inkhawm zawh hian Chief Minister hian community hall sakna hmun tur a en nghal bawk a ni.