2795/2026-2027

Champhai the 23rd October 2026: Vawiin khan Chief Minister Pu Lalduhoma chuan PM USHA (Pradhan Mantri Uchchatar Shiksha Abhiyan) scheme atanga thawh Government Champhai College-a hmasawnna tharte:

1. Rs. 370 lakh senga thawh Classroom / Building,
2. Rs. 40 lakh-a thawh Renovation of Multipurpose Hall,
3. Rs 40 lakh senga siam Semi Running Track
4. Rs. 50 lakh senga thawh Solar Plant, Vocational Skill, personality development programmes, workshop, IT & Lab equipment, Solar equipment-te chu a hawng.

PM USHA First Phase-ah hian Mizoramah College pahnihah hma lak phawt a ni a, pakhat chu Govt. Champhai College ah a ni a, contractor chu Tiberia, Zotlang, Aizawl an ni a. 12th February 2025 ah hna an thawk tan a, kumin July ni 15 khan an thawk zo a. Hun tiam chhungin an thawk zo a ni. First phase-a hmalakna dang chu Kolasib Govt. College niin Kolasib lama hna pawh hi zawh fel tawh a ni.

He project hawn rual hian College Week 2026 kharna inkhawm neih a ni bawk.

Chief Minister chuan, Champhai College-a lo lut ve tawh, first batch ka ni a, zanah kan kal thin a. Khatihlai khan Bati engah lehkha ka zir thin. Kei chang ka ni lo va kan fate pawhin an zir ve zel a. Kan intineitu em em a ni.

Vawiinah chuan in lo changtlung ta hle a, Mizorama sorkar multi displinary College nei zinga stream ngah ber in lo ni ta a ni. Hmunhma in nei tha a, Mizoram State University a puitlin hunah chuan University Campus in nih zui ngei pawh a rinawm a ni.

Heng hmasawnna tharte hi he district tan chauh ni lovin Mizoram tana hmasawnna a tling a. Hman ni lawk khan he College Hostel sak zawmna tur hi Rs. 50 Lakh kan pawm fel leh a. Retaining Wall leh Parade Ground siamna tur pawh kan pe ang che u.

Infrastructure lamah chuah kan thuam tha lo va, zirtirtu (Assistant Professor) hi RUSA atangin pali (4) kan dah belh tawh a, BCA lamah Assistant Professor pali tho kan dah thar a, contractual faculty pathum, tuna thawk mekte pawh dahngheh turin order siam fel vek tawh a. Zirtirtu thar pariat kan pe tihna a ni. Heng zawng zawng hi zirna sang zawk lama Mizoram leh Champhai district-in hma kan sawn zelna atana kan hmalakna leh NEP 2020 thiltum tihhlawhtlinna a ni, a ti.

Heng PM USHA hmanga hmalaknate hi February 2025 atanga hna kan thawh tante an ni hlawm a. A tam zawk hi November 2025 a bul kan tan an ni nghe nghe a. Hun rei lote chhunga chak taka hna thawhtu RUSA lama kan thawktute leh kan contractor-te chungah lawmthu ka sawi a ni, a ti bawk.

Chief Minister hian tun hnaia Champhai district-a sorkarin hmasawnna hna a thawh langsarte a tarlang nghal a. Chungte chu:

1. Champhai Tlangrawta Working Women Hostel sak mek te,
2. District Jail-a Male Ward, Female Ward, Security Main Wall & Separation Wall, Duty Posts leh Watch Tower bakah Type II Staff Quarters sak mek te,
3. Champhai luhka Khankawn - Kanan Veng laih zau mek te,
4. Champhai Ring Road (khankawn - Hmunhmeltha - Zote) laih hna te,
5. Upgradation of Zotlang to Tlangsam Road thawh tura ruahman te,
6. New Champhai Sports Complex-a Grass phah hna tan a nih thu te,
7. Swadesh Darshan 2.0 hnuaiah cheng vaibelchhe 38.85 senga Eco Resort Experience hmun pali - Keilungliah, Zote, Ngur & Mualbuhvuma kalpui mek a nih thu te,
8. Crore 33.87 senna tur Heritage and Cultural Center Champhai Vengsanga sak tum a nih thu te,
9. New Champhaia Sapthei Tui sawrna khawl bun hna chu thawh zawh tep a nih thu te,
10. Ginger USP Project, Mizoram Ginger Sustainable Cultivation & Value Chain Development hnuaia Sawhthing Processing Unit pali Mualkawi, Tualcheng, Zotlang leh Vaphaia dinna tur Rs. 30.13 Crore Ministry of DONER in NEC kaltlanga a sanction thute an ni.

Hengte bakah hian Bana Kaih hnuaia Decentralised Plan hmanga Champhai DC kaihhruaina hnuaia project chi nga: Project Sunsilk, Project Greenshield, Project LEAD, Project RISE leh district mobile app siamna te kalpui a nih thu a tarlang bawk.

College week hlim taka an hman a beisei thu a tarlang a, week chu zirlai naupangte tana hmelhriat thar chharna hun tha a ni a. Kan dam chhunga kan thian tha ber berte hi kan batchmate te an ni duh hle. Infiamna lama an talent hmuhchhuahna hmun a ni fo bawk a ni.

Zirlai naupangte hi nakin lawka kan ram hruaitu, khawtlang hruaitu, kan officer leh kohhrana kan rawngbawltu turte in ni a. Taksa leh rilru hrisel tak in neih a tul a. Ruihhlo lakah lo fihlim vek ula ka duh hle a, ruihhlo laka fihlim dan awlsam ber chu tihchhin loh hi a ni tih in lo hrereng dawn nia, tiin naupangte hi thu a chah a ni.

Tunah hian he College-ah hian zirlai 589, faculty regular 32 contract 5, casual 19, part time 1 bakah Non teaching staff 15 an awm a ni.

PM USHA Project hawnna inkhawmah hian Pu Lalthanpuia, Principal, Govt. Champhai College chuan kalkhawmte lawmna a sawi a. Er. Joshua Lalthakima, Asst. Engineer, PM USHA chuan technical report a pe a. Building Contruction hi Quality endikna paltlang thlap a nih thu a tarlang.

Pu R. Lalchhuanawma, Vice Principal chuan lawmthu sawiin inkhawm a khar a ni.