2794/2026-2027

Aizawl, dated 23rd October 2026: Public Works Department Minister Pu Vanlalhlana chuan vawiin khan Engineer-in-Chief Conference Hall, PWD, Tuikhuahtlangah PWD officer leh engineer hovin PWD hnuaia hnathawh hrang hrang - thawh zawh tawh te, thawh mek te leh hmachhawp te thlirletna leh sawihona (review meeting) an nei a, he hunah hian khuallian a ni bawk a ni.

Khuallian Pu Vanlalhlana chuan hetiang review meeting an buatsaih hi a tangkai a tih hle thu a sawi a, thlirletna a nih mai bakah a hma aia tha zawka thawh theihna tur leh hmasawnna tur a ni tih a sawi a. Hna reng reng chu hunbi dik taka zawh tum zel turin a chah a, inthlahdah avanga tih khawtlai te hi thil zahthlak a ni a, hetiang lakah hian fihlim hram turin a chah. Mipui sum hmanna kawngah mawhphurhna lian tak an nei tih sawiin thil siam thar emaw thil siam sa enkawl hna emaw, engkim hi tha taka thawk zel turin a chah a ni. Finance leh administration chungchang report a ngaihthlak te pawh bengvarthlak tiin zir tur a tam hle niin a hria a, hnathawh that bakah hian thil ho anga lang, pawimawh deuh deuh si, pisa inrelbawlnaa tul chi hrang hrang te, thiam chianga hre chiang zel turin a fuih. He hun hi hlawkthlak tak a nih ngei nan duhsakna a hlan a, taimakna leh thawhrimna nen thawk zel turin a chah a ni.

He hun hi PWD Commissioner & Secretary Pu V. Lalsangliana chuan chairman niin a kaihruai a, khuhhawnna thu hi PWD Engineer-in-Chief Er. David Sapzova'n a sawi. Zing hunah hian PWD E-in-C hnuaia Joint Director (Finance & Accounts) Pu C. Lungmuanpuia, Deputy Director (Admin.) Pu Lalremmawia leh State Quality Coordinator Er. T. Lalkhanhau te chuan pisa inrelbawlna chungchangah report an pe a, chawhnuah circle hrang hranga Superintending Engineer te'n an hnathawh chungchang report pein division hrang hrang hnuaia hnathawh te ngaihthlak a ni bawk. Heng thusawi ngaihthlak pah hian zawhna leh chhanna neih a ni tel bawk a, tha zawka hma lak theih dan te, harsatna sutkian dan tur te leh thil dik lo chin fel dan tur te sawiho a ni.