2793/2026-2027

Lunglei, 2026 Khuangchawi Thla ni 23: Vawiin khan Lunglei District Development Co-ordination and Monitoring Committee (DISHA) chu an Chairman, Member of Parliament (Lok Sabha) Pu Richard Vanlalhmangaiha hovin Lunglei DC Conference Hall-ah an ṭhu khawm.

Chairman Pu Richard Vanlalhmangaiha chuan DISHA chu sawrkar laipui ruahmanna hnuaia hmasawnna hna thawh hrang hrang thlir hona hun a nih angin a pawimawh hle tih sawiin, member-te pawhin ngai pawimawh tur leh rawtna lutte chu chak taka bawhzui zel turin a chah a. Line department-te hma lakna chu lawmawm a tih thu sawiin, awmze nei zawk leh chak zawka hmasawnna hna thawh kalpui a nih theih nan department hrang hrangte chu theih tawp chhuah chhunzawm zel turin a chah.

Lunglei DISHA ṭhut khawmah hian Lunglei West bialtu MLA Pu T. Lalhlimpuia, Lunglei Municipal Council (LMC) Chairman Pu Lalzuithanga, Additional Deputy Commissioner Pi Rochuangkimi Khenglawt leh DRDO Project Director Pu Lalremruata Sailo te bakah, line department official-te, Scheduled Tribe (ST) leh hmeichhe ai awhte an tel a. Sawrkar kum kal mek 1st Quarter leh 2nd Quarter (April – September 2026) chhunga Lunglei District-a sawrkar laipui ruahmanna (centrally sponsored scheme) hnuaia hmasawnna hna hrang hrang kalpui dan thlir ho niin, harsatna awmte leh a chin fel dan tur leh hma lak zui zel dan tur te sawi ho a ni.

He DISHA ṭhut khawmah hian sawrkar laipui scheme hrang hrang – RD Department hnuaia VB-GRAMG, PMAY-G, PMAY-G Awaas Plus, PMKSY 2.0, MzSRLM, DDU-GKY leh Lakhpati Didi te; PWD hnuaia PMGSY te; PHE Department hnuaia AMRUT 2.0, JJM leh SBM(G) te; P&E Department hnuaia RDSS te; LR&S Department hnuaia DILRMP te; FCS&CA Department hnuaia PMUY leh NFSA te; H&FW Department hnuaia National Health Mission (NHM) programme hrang hrang te; Transport Department hnuaia VAHAN leh SARATHI te; LAD hnuaia RGSA leh 15th Finance Commission Grant te; Agriculture & FW Department hnuaia RKVY, Soil Health Card, ATMA, PMKSY-PDMC, PMFBY, PM-KISAN, AIF leh scheme dang te; AH & Veterinary Department hnuaia RGM, NADCP leh NLM te; School Education Department hnuaia Samagra Shiksha leh PM-POSHAN (Mid-Day Meal) te; Social Welfare Department hnuaia NSAP te; Women & Child Development Department hnuaia Saksham Anganwadi & Poshan 2.0 leh Mission Shakti (BBBP, PMMVY, OSC, CP&SC, etc.) te; UD&PA Department hnuaia SBM(U), PMAY(U), PM-SVANidhi, Shelter for Urban Homeless (SUH) leh AMRUT Mitra te; Lead Bank Office hnuaia PMJDY, PMJJBY, PMSBY, APY leh scheme hrang hrang te; Commerce & Industries leh KVI hnuaia PMEGP, PMFME leh SAMARTH te; Fisheries Department hnuaia PMMSY te; Labour Employment/ITI hnuaia NCSP, e-Shram leh PMKVY 4.0 te; Legal Metrology hnuaia BIS te; BSNL hnuaia 4G Saturation Scheme te; RSETI hnuaia Skill Development Training leh NHIDCL hnuaia hma lakna te sawi ho a ni.

Lunglei DISHA ṭhut khawma tar lan a nih danin, VB-GRAMG hnuaiah Lunglei District-a khaw 106-ah Gramin Rozgar Guarantee (GRG) Card nung lai 21,101 awm mekin, kum 2026–2027 chhungin ni 64 inhlawhna siam tawh a ni a. Hna thawh tur ruahman 1,342 aṭangin hna 69 thawh zawh tawh niin, thawh mek 1,273 a la awm a. Lakhpati Didi hnuaia SHG member-te'n kum khata cheng nuai khat aia tam la lut tura hma laknaah Lunglei District-ah kum 2023–2029 atan target 5,900 awmin, 1,108 (18.78%) tihhlawhtlin tawh a ni.

PMGSY hnuaia Lunglei–Kawlhawk–Buarpui Road kilometre 66.500-a thui siam ṭhat mek chu 57% zawh tawh niin, Phairuang–Thenhlum (Upto Bolia) Road KM 48.770-a thui siam ṭhat mek chu 48% leh Phairuang–Thenhlum (Bolia to Thenhlum) Road KM 16.230-a thui siam ṭhat mek chu 49% zawh tawh a ni.

AMRUT 2.0 hnuaia cheng nuai 997.78 senga Greater Lunglei Water Supply Scheme (GLWSS) tihchangtlun hna thawh mek chu 100% zawh tawh niin, SASCI hnuaia cheng nuai 5,570 senga GLWSS tihchangtlun hna thawh mek chu 86% zawh tawh a ni a. AMRUT 2.0 hnuaia cheng nuai 795.21 senga Tlabunga WSS (Solar Pumping) tihchangtlun hna thawh mek pawh 92% zawh tawh a ni.

Revamped Distribution Sector Scheme (RDSS) hnuaiah Lunglei Power Circle huam chhunga khaw 94-ah KM 86.35-a thui 11kV Line 3-Phase leh KM 27.69-a thui New LT Line 3-Phase, 5-Wire thlun thar niin, 25kVA, 11/0.4kV Distribution Transformer 63 leh 63kVA, 11/0.4kV Distribution Transformer pakhat bun thar a ni a. Mi mal ina eng pek belh tur tinzawn 2,378 aṭangin 1,305 (54.88%) tihen belh tawh a ni.

Tun dinhmunah DCSO Lunglei hnuaiah ration card 41,062 awmin, ration card-a hming chuang mi 1,47,595 an awm mek a; card 931 (member 1,979) chu ration khul nana hman theih loh (NER Card) a ni a. PMUY hnuaia a thlawna gas connection pek chhungkaw 922 an awm bawk.

Samagra Shiksha hnuaiah kum 2026–2027-ah Lunglei District chhunga zirlai 9,680 hnenah a thlawnin sikul thuam (uniform) sem a ni a, zirlai 9,735 hnenah a thlawnin zirlaibu sem a ni bawk a. PM-POSHAN hnuaiah sikul 441-a zirlai 21,109 hnenah a thlawnin chawchhun pek a ni bawk.

NSAP hnuaiah kum 2025–2026 chhungin Lunglei District chhungah tar chawmna (old age pension) la mi 3,642; hmeithai (widow) pension la mi 314, vohbik (disability) pension la mi 102 leh National Family Benefit Scheme hnuaia ṭanpuina dawng chhungkaw 30 an awm a. Lunglei District chhunga Anganwadi Centre 304 kal tlangin Supplementary Nutrition Programme (SNP) hnuaia chaw ṭha dawng naupang, hmeichhe tleirawl, nu nau pai leh nau pawm mi 11,296 an awm.

SBM (Urban) hnuaia bawlhhlawh sawngbawlna tur, cheng nuai 600 senga sak Lunglei Solid Waste Management Centre-I chu a sak hna 100% zawh tawh niin, khawl leh hmanraw mamawh bun chhoh mek a ni a. Cheng nuai 67.59 senga sak Tlabung Solid Waste Segregation Centre pawh 100% zawh tawh niin, cheng nuai 385 senga sak Lunglei Solid Waste Management Centre-II pawh 90% zawh tawh a ni a. Shelter for Urban Homeless (SUH) hnuaia cheng nuai 39.79 senga Christian Hospital Serkawn bula damlo awmpuitute riahna tur, 'Patient Attendants Shelter' sak mek chu 90% zawh tawh a ni bawk.