Chief Minister Pu Lal Thanhawla chuan kumin Right to Information Week chu Synod Conference Centre-ah a hawng. Vawiin ni 5 atangin October ni 12 thleng RTI Week hi hman tur niin, Mizoram district tinah hman vek a ni ang.

Chief Minister Pu Lal Thanhawla chuan RTI Week Mizorama hman a nih tirh atangin mipui leh sawrkar tana thil tha thlentu a nih dawn avanga a lawm thu leh, tunah RTI chinfel kawngah Mizoram chu a ti tha ber pawl a nih zel avangin a lawm thu a sawi. Sawrkar chuan mipui lakah thuhruk emaw thuruk emaw a nei tur a nilo a, sawrkar hmalakna project hrang hrangte chu mipuiin chiang taka an hriatpui a pawimawh avangin RTI chu sawrkar inrelbawlnaah langtlang leh fai, chak leh awmze nei sawrkar siamna hmanrua tha a ni tiin Chief Minister chuan sawrkar hmalakna thenkhatah pawh a tulnaah chuan "social audit" te neih thin a nih thu a sawi. India ramah Mizoram chu ei leh barah a than nasat thu sawiin Gross State Domestic Product thang chak ber state pali zing a mi a nih thu te, Per Capital Income pawn national average a khum thu te leh tehna dang hrang hranga a ber a nihna te sawiin Chief Minister chuan mipui leh sawrkar hnathawkten mahni hna theuh tha taka an thawh thin vang a ni a ti a. A aia sang zawkah kan tanho chuan kan awm thei dawn a ni tiin sawrkar department tinte chu RTI zawhna an hmuh te a rang thei ang bera bawhzui zel a, state dangte tan entawn tlak Mizoram chu a nih theih nan sawrkar hnathawk kalkhawmte chu a sawm a. Mizoram chu corruption free mai nilo in scheme leh project kalpui te chak zawka tihlawhtlin thin a nih theih nan a thawktuten hma an lak a duh thu a sawi a. Zau zawkin RTI chungchang inhrilhhriat a, Act chu a duangchhuaktute duh dan ang taka sawrkar tha leh langtlang siam a nih nan RTI buaipuitute chu taima leh thahnemngai taka thawk turin a sawm a ni.

Chief Information Commissioner Pu Lalduhthlana chuan sawrkarin RTI Week a ngaihpawimawhna chuan langtlang sawrkar leh mipui banphak sawrkar nih a duhna tilangtu nia a hriat thu a sawi a. Mipuiten an zawh hmasak kher ngailo a an hriat duh leh tul te mipui hmaa awlsam zawka chhawpchhuah a inhrilhhriatna lama hmalak chu tunah Information Commission in a thil tum lian tak a nih thu a sawi a. Tangkai zawka RTI hman a lo nih zual zel nan sawrkar department tin SAPIO, SPIO leh PIO te chu thawhhona tha tak neih pui zel atan a sawm bawk.

Vawiin RTI Week hawnna inkhawm hi Pu Zorammawia, Information Commissioner chuan kaihruaiin, Pu Vanlalvuana, Transport Department Deputy Secretary chuan RTI Act, 2005 leh Mizorama hman a lo nih tawh dan te a sawi a, RTI hlawhtlinna chuan dilna luh tam leh a chhanna pek chhuah tam lam bakah sawrkar inawpnaah a taka danglamna a thlen a pawimawh a ni, a ti. Inkhawm hi Pu Vanlalngena, MIC Secretary chuan lawmthu sawiin a khar a. He programme ah hian sawrkar department hotulu te leh RTI buaipuitute bakah College zirlaite an tel a ni.