Right to Information (RTI) pawimawhzia inzirtir tharna chawlhkar RTI Week 2018 chu vawiin khan Lawngtlai District tan LADC-a Executive Member i/c I&PR Pu H. Chhuanawma'n Lawngtlai DC Conference Hall-ah a hawng.

Pu H. Chhuanawma chuan mihringte tan hriatna a pawimawh em em a, tunlai khawvelah phei chuan a tel lovin nun a harsa tawh hle tih sawiin, kawng tinrengah thil hre tam apiang an dingchang thin, a ti a. Tun hma chuan sawrkar chu mipuite lakah a inthup thin a, tunah chuan RTI avangin lang tlang sawrkar kan neih theih phah a ni, a ti a. RTI hmanga zawhnate zep ruk awm lova chhang thei turin officer-te chu dik taka hna thawk turin a chah nghal.

He hun hi Lawngtlai DIPRO Pu C. Lalhruaitluanga MIS chuan kaihruaiin, RTI Week chungchang a sawi fiah a. Lawngtlai Sub-Deputy Commissioner Pu Lalsanglura MCS chuan RTI Act 2005 chungchang powerpoint presentation hmanga sawi fiahin a zirtir a. Hemi hnu hian RTI kaihhnawih sawi hona leh zawhna leh chhanna hun hlawhtling tak hman chhunzawm a ni a. Zaithiam zai ngaihthlak a ni bawk.

RTI Week hi Mizoram Information Commission leh Directorate of Information & Public Relations tang kawp huaihawtin kum 2011 atang khan kum tin October ni 5-12 chhung hman a ni thin a. Kuminah pawh October ni 5 atanga ni 12 chhung bawk hman leh tur a ni. Vawiina Lawngtlaia a hawnna hunah hian state leh LADC sawrkar hnuaia SPIO leh SAPIO te, tlawmngai pawl hrang hrang ai awhte leh chanchinbu mite bakah, Harvard Higher Academy leh Lairam Higher Academy of Science (LAHAS) zirtirtute leh zirlaite an kal khawm a ni.