Vawiin khan CEO Pu S.B Shashank chu Voters’ Fest hmanna Vanapa Hall-ah khuallian a ni. District Election Officer (DEO) Dr. A. Muthamma chuan Voters’ Fest hi hawngin; Pu Allan Lalthanzara, Asst. Commissioner chuan he hun hi a kaihruai a ni.

Khuallian chuan thusawiin, India ram hi inthlang ram niin, mipui thlan a piangin rorelna an chang mai thin a, Mizorama MLA General Election lo awm turah pawh hian mipuiin hmun pawimawh tak vuanin, Inthlan huna vote thlak theuh chu mi zawng zawng mawhphurhna a ni, a ti a. Kum 2013 Inthlan-ah khan Mizoram chu India rama vote thlak tha ber zingah telin, Mizorama vote nei 83% in vote an thlak a ni, a ti a. Kum 2018 Inthlan-ah hian hei aia thaa thlak theih a beisei thu leh mipuite chu tha hnem ngai taka Inthlan ni-a tul dang kalsana Polling Station-a kala, vote thlak ngei turin a ngen nawn a ni.

Dr. A. Muthamma, DEO pawhin thusawiin, mipuite, abikin thalai rualin vote an thlak hi a pawimawh em em a ni, a ti a. ECI chuan mi zawng zawng huapzo Inthlanna buatsaih hi a tum a ni a, chutah chuan India ram mi kan nihna angin, tihtur kan neih chu ma theiloa vote thlak hi a ni, a ti a. Zirlai lokal khawmte hnenah chuan Kum 18 an tlin hunah, Electoral Roll-a in register ngei ngei turin a chah bawk a ni.

Dr. Lalhriatzuali Ralte, Dy. DEO chuan PowerPoint Presentation hmangin Election chungchanga Kum 18 tling mai tur zirlaite hriattur pawimawh tak tak sawifiahna hun a nei a. Pu Lalbuatsaiha, PwD Icon pawhin thusawiin, taksa lama harsatna neite pawhin vote an thlak theihna tura ECI ruahmanna te sawiin, tumah a bang awmlo a, Inthlan huna vote thlak tura pen chhuak turin a ngen bawk a ni.

Voters’ Fest hi Ni Hnih awh tur a ni a, Poster Making Competition, Debate Competition, Dance Competition te a nikhatna ah hian buatsaih a ni. Higher Secondary School Zirlai leh College hrang hrang zirlai leh zirtirtute an kal khawm a ni.