Kar khat chhung 5th - 12th October 2012 awh tur, India ram puma hman Right To Information (RTI) Week chu Mizoram Information Commission leh Directorate of Information & Public Relations tangkawp ina a buatsaih chu vawiin khan Vanapa Hallah Chief Minister Pu Lal Thanhawla chuan a hawng.

Chief Minister chuan felfai leh langtlang sorkar awm tur chuan RTI Act hi hman tangkai a tul a ni a ti a. RTI Act hi ringtu kan nihna nen pawh a inhmeh hle a, hman anih atangin mi inthlahdah thin te pawh an fimkhur phah a, a lawmawm hle a ni a ti a. Official lam ai mahin mipuite hian hmang tangkai thei se a duhthu a sawi a. RTI Act hi inhekna a nilova, sorkar hna chhungah kan thil hriat duhte kan hriat theihna tura hmanrua a ni a, tumahin hmelma anga lak tur a ni bawklo a ti. Kawng dik kan zawh theihna tura hmanraw pawimawh tak a ni a ti.

Chief Minister chuan kan sawi tam ber chu corruption a ni a. Corruption tih hian sorkar sum eiruk ah chauh kan ngai a, mahse corruption tih hian a huam zau hle a, thatchhiatna te, mahni hna a tui miah loh te, kuttling lova sum lakluh duhna te, tlem thawha tam tak lakluh tumna te, zawmthawtna te leh dawngdahna te a huam vek a ni a ti a. Chuvangin RTI Act hi nasa leh zuala kan hman tangkai a tul a ni a ti. Diklo taka thil titute pholanna hmanrua a ni thei bawk a, RTI Act hmanga zawhna te chu chhanna dik kan pek hi kan tih tur a ni tih kan hriat a tul a ni a ti. Sorkar chezia leh kalphungte hriat theihna hmanrua a ni a, sorkara lungawi lohna nei ten chanchinbu lama tarlan kher ngai lovin, RTI Act hi an tangkaipui thei a ni a ti.

RTI Act hi sorkar hnathawkte min khalh ngil tu leh kawng dik min kawhhmuhtu a ni tiin, Chief Minister chuan phur taka kan kalpui hi a tul a ni a ti a. Rorelna dik awm theih nana hmanraw pawimawh tak a ni a ti a. RTI ang bawka sorkar leh a hnathawktute vil turin Ethics Committee pawh din a ni a ti a. Zoram pumah ngaihtuahna thar leh tha kan siam theih nan RTI Act hi min puitu pawimawh tak a ni thei a ni a ti.

RTI Week hmanna denchhenin Chief Minister hian RTI Act buaipuitute tan leh a hmang tu mipuite tana tangkai tur lehkhau (booklet) 2, RTI Act, 2005 - Guidelines for Public Authorities tih leh Guidelines for Information Seekers tih te a tlangzarh bawk a ni.

RTI Act, 2005 hi Mizoram-ah kum 2006 atang khan hman tan a ni a. A Hapta hawnna hi tum hnihna a ni. Chief Information Commissioner Pu Laldingliana chuan kalkhawmte lawmna thuchah a sawi a, Resourse Person Pu Vanlalvuana, Analyst, DP&AR (ARW) in RTI chungchang hrilhzauna a nei bawk a ni.