Zan khat riaka Mizoram rawn tlawha lo zin Union Power Minister of State Pu K.C. Venugopal chuan vawiin chawhma khan Mizoram Chief Minister Pu Lal Thanhawla chu a chenna Inah hmuin Mizoram chhunga kawlphetha chungchang huam zau takin an sawi dun.
Chief Minister chuan Union Minister hnenah hian Tuirial Hydel Project chungchang chipchiar taka hrilhin zangnadawmna pek tur hautak lutuk avanga hluihlawn a nih dan leh tuna a kaihhruai sorkarin Prime Minister leh UPA Chairman te phurpuina hmua tharthawh leh a nih dante a hrilhfiah a. Chief Minister hian Union Minister hnena a tarlan langsar zual deuh deuh te chu hmarchhak state tlangram leh kilkhawr tak takah te hian power mamawhna a nasain a siamchhuahna kawngah pawh a hautak bik zia te, sorkar laipui pawhin heng harsatna te hi hriaa sum tam zawk ruahmansak a tul dan te leh tlangram lui tui hmang tangkaia power tenau siamchhuah kawngah mipui leh sorkar tankawp (PPP mode) a remchan theih dan te an ni a. Power changtu ni bawk Chief Minister hian kawlphetha 210 MW pe chhuak thei tur Tuivai Hydro Electric Project hmalakna kalpui dan a sawi lang bawk a. Thui tak kalpui tawh a nih dan leh Finance Ministry leh Power Ministry inkarah thil chinfel ngai la awm chu hmabak mek a nih dan te Union Minister hi a hrilh a. Chhimtuipui (815 MW) leh Lungreng(635 MW) HEP atana hmalakna ah pawh survey leh investigation tluang taka a kal theih nan a tul anga lo bawhzui sak turin a ngen bawk. Kolodyne HEP II (460 MW) thawktu NTPC te chu an hna a muanchan thu leh tur hmanhmawh an tul thu Chief Minister hian a sawi tel a ni. Kawlphetha Transmission leh Distribution tihchangtlun nan Mizoram chuan a lo berah Rs 127 crore amamawh tur thu hrilhin hei pawh hi a tul anga lo bawhzui sak turin Chief Minister hian a chah a. NEEPCO-in Hydel Project pahnih an thawh mek - Kameng (600 MW) leh Tuirial (60 MW) project te pawh hawn a nih thuai theihna turin Power Ministry lamin lo tur hmanhmawh ve turin a ngen nghal a. Pu Lal Thanhawla chuan Orissa-II Ultra Mega Power Project atanga Mizoramin kawlphetha 40 MW a hmuh theihna tura thawktu SPV hnenah Rs 40 lakhs pek fel a nih tawh thu leh hei pawh hi hun tiam chhung ngeia Mizoramin a hmuh theihna turin Power Ministry chu tan lakpuiah a sawm nghal bawk a ni.
Union Minister of State for Power K.C.Venugopal chuan Chief Minister thu thlen te hi ngun taka a ngaihthlak hnuah a tul anga hmalakpui a tum dante, Tuirial HEP pawh kum 2014 ah chuan hawn hman ngei a nih tur thu a sawi a ni. Power Minister hian Mizoram chhunga kawlphetha tihchangtlun leh chak taka hna kalpui chu sorkar laipui pawhin a ngaihpawimawh berte zinga mi an nih thu a sawi lang bawk a ni. Union Minister tawiawmtu NEEPCO hotu ten Tuirial HEP atana hmalakna kal meka an mamawh hrang hrang an sawi venghimtu leh a panna kalkawng cheithat an sawi lan te chu Chief Minister hian a bawhzui tur thu vawiina a inkawmna ah hian a sawi lang bawk a ni.
