3674/2024-2025

Dated Aizawl, the 4th January, 2025: Vawiin khan Aijal Club-ah Chief Minister Pu Lalduhoma chuan Dr. Selbuanga Foundation (Sel Foundation) te bultuma siam, mithiam paliten zirchianna behchhana an ziak "Mizo History leh Sailo Lal Ropuite: Vandula leh Ropuiliani" tih lehkhabu a tlangzarh.

Thu a sawinaah Chief Minister chuan, Mizote hi hnam naupang anga sawi tak mai chang a awm thin a. Nimahsela, kan pi leh pute sulhnu kan hmuh te atang hian hnam naupang kan nih lohzia a langin ka hria. An hmun hlui ropui tak tak te, an sakhua te, an themthiamthil dangte atang hian hnam upa leh hriatna thuk tak nei kan ni zawk. Ziak leh chhiar kan thiam har avang leh kan history kan hriat thui loh avangin hnam naupang emaw kan inti ta mai niin ka hria. Vawiina kan history hriat tam tak pawh hi min awptu Saphote lo chhinchhiah kha an ni a, annin min awp hma lam hun chhui chhuah ngai kan la ngah a ni. Hei hi thangtharten chonaah ngai ila, a tuimi leh history zir kan mithiamten i ngaihven ang u. Sawrkar pawhin hnam tobul chhui chhuah chu a policy pakhatah a dah a, a tul angin hma kan la zel dawn a ni, a ti.

Selesih sangsarih atanga an darh hnua Mizoram chhim lam ram bawha inzar pharh lal Rolura thlahte chanchin chhui zuina lehkhabu tha tak kan neih belh ta a. A bik takin lal Vandula leh a nupui Ropuiliani, India freedom fighter ropui leh ngaihsanawm chanchin tam tak min chhawp chhuahsak hi a hlu zual a ni. Anni chanchin hi India mipuite pawhin min tuipui tial tial a, an hming kan lam ni apiangin kan inchhuang thin. Ropuiliani lem mawi tak hi Prime Minister Pu Narendra Modi ka lo pe tawh nghe nghe a. Ani pawhin a lo ngaihlu thiam hle. An phumna hmun thuah inhnialna a awm tih kan hre theuh a, keini ang, engmah va hre thuk lem lo chuan an tu leh faten an hrechiang ber turah kan lo ngai a ni. Engtikah emaw chuan sawrkar pawmpui theih tur thutlukna a la awm ngei ka beisei, a ti bawk.

He lehkhabu hi Sel Foundation ten history lam zirthiam mi palite thawhpuia an buatsaih a ni a. A ziaktute hian history thuziak awm tawhsa leh tawngkaa thu inhlanchhawn an hmuh theih ang ang, Mizoram leh a thenawm state Archive a mi te thlenga dapin, an thil hmuh leh hriat te atangin scientific research methodology hmangin he lehkhabu hi an buatsaih a ni. Ropuiliani phumna dik zawk chhuak turin DNA test an kalpui mek thu pawh an tarlang.

Lehkhabu tlangzarh inkhawmah hian Rev. Dr. H. Vanlalauva'n hunserh a hmang a, Dr. Hmingthanzualin lehkhabu thlir zauna a nei a, a ziaktute atangin Dr. Laithangpuiin thusawina a nei a, Pu Lalthuama Sailo, Vandula leh Ropuiliani te tuchhuan hnihna chuan Mizo Historical Map a tlangzarh a; Pu Alfred Zothansanga Sailo chuan lawmthu sawiin inkhawm a khar a ni.