3673/2024-2025

Aizawl, the 4th January, 2025: January ni 6-10, 2025 chhunga Indian Institute of Mass Communication (IIMC), New Delhi-a training tur Mizoram Information Service (MIS) Officer 12 te chu vawiin chawhma dar 11:00 khan I&PR Secretary Pi Betsy Zothanpari Sailo chuan Directorate of I&PR Office tual atangin a vai liam.

I&PR Secretary Pi Betsy Zothanpari Sailo chuan Sawrkarin MIS Officer-te puala training tha tak IIMC Delhi-a a ruahman sak chu lawmawm a tih thu leh vanneihthlak a tih sawiin, training turte chu an kal chhante hriaa theihtawp chhuah turin a fuih a. Training chuan mimal, Department leh Mizoram tana hmasawnna leh rah tha a chhuah ngei a beisei thu sawiin, taimakna, rinawmna leh inthununna tha tak nena training hlawkthlak tak nei tura duhsakna hlanin a vai liam a ni.

MIS Officer training turte hi Pu Malsawmsanga, Dy. Director chuan hovin a ni bakah hian I&PR Directorate-a IPRO 2 leh District hrang hrang atanga DIPRO 9 te an tel a ni.

Vawiina training chhuak tur vailiamna hunah hian Pi Mina Zoliani Joute, Jt. Director bakah I&PR Officer dangte an tel a ni.