Chief Minister Pu Lal Thanhawla chuan vawiin khan Aijal Club-ah State Bank of India (SBI) branch panga (5) a hawng. Hawnna hi branch tin awmna hming ziahna plaque khuhna chu pawt pharhin a mal te te in a hawng a, heng branch hawn te hi Durtlang Dawrkawn-ah, Pi Aimawii building, Khatla-ah, Pu Lalrammawia building, Kulikawn-ah, Pu R.Lalsangluaia building, Zemabawk, Kawn Veng-II, Post Office epa Pu F.Bialzaua building leh Dawrpui-ah, Zoram Platinum, Pu F.Kapsanga building, Ritz Hotel bul te an ni.

Hawnna inkhawmah Chief Minister chuan Mizoramah SBI hi inpharhzau ber leh branch ngah ber an ni chu bank dangte pawhin entawn se a duh ti a sawi a. Corporate Social Responsibility (CSR) atanga midangte phal taka tanpuina an hlan thin hi an fakawm tak zet a ni a ti a. Bank hi Mizo ten kan hman tangkai tur angin ka hmang tangkai thin lo a ni tiin, loan puk erawh kan duh a mahse a rulh leh lamah kan taimak thin loh avangin kan in puk ping zel a ni a ti a. ZIDCO pawh kan puk cha der a, kan inbihchian a, in siam that tur kan ngah hle a ni a ti. Chief Minister chuan SBI in branch thar an hawnin tualchhung mi ngei an chhawr zel thin chu a lawmawm tak zet a ni a ti.

Pu Sanjay Kumar Magoo, Chief General Manager, SBI, N.E.Circle pawhin thusawiin, Mizoramah branch dang la hawn zel a ni ang a ti a. CSR kaltlang hian tanpui ngaite kan la tanpui chho zel dawn a ni a ti bawk.

SBI hian Corporate Social Responsibility leh Community Service Banking atangin CYMA hnenah Mortuary Van cum Ambulance an pe (donate) a, Samaritan Association for the Blind hnenah School Bus- Marco Polo Star Bus, 24+1 thut theihna an pe bawk a. Heng an thilpekte hi Chief Minister Pu Lal Thanhawla chuan chabi pein a hlan sak a ni. CYMA aiawhin Pu Vanlalruata, Gen Secretary in chabi hi a dawng a, Samaritan Association for the Blind President in a dawng bawk a ni.

SBI hian CSR hnuai atang hian Mizorama pawl hrang hrang leh zirna in, rualbanlote leh fahrah enkawlna inah te tanpuina thahnemtak an lo hlan tawh a ni. Vawiina branch 5 hawn takte nen hian Mizoramah branch 36 an hawnna a ni.

Hawnna inkhawmah hian Pu T.Sangkunga, Chairman, Mizoram Youth Commission leh Pu Laldingliana, Chief Information Commissioner te an tel a ni.