Tamdil Wetland Project a Forest Department hmalakna a sum hman dan felhlel deuh te awm anga Comptroller & Accountant General in report a pek te chu Mizoram Legistlative Assembly Public Account Committee(PAC) chuan July 18 khan Tamdil ah kal in a endik. He Spot Study ah hian Forest Department sum hmanna record-te leh an hmalakna hrang hrang te chipchiar taka endik leh zirchian a ni a, hemi behchhan hian PAC review meeting neih hun ah thutlukna siam a ni ang.

PAC ah hian Pu K.Sangthuama, MLA, Chairman a ni a, member dang te chu Pu S. Laldingliana, MLA, Vice Chairman, Lunglei HPC, Pu R.L. Pianmawia, MLA, Deputy Chief Whip, Pu Lalrobiaka, MLA, Chairman, ZIDCO, Pu Lalthanliana, MLA, Pu Lalruatkima, MLA leh Pu Chalrosanga, MLA te an ni.

PAC hi Forest Department hotuten Tamdil ah lo dawngsawngin an hmuh duh te lo kawhhmuhin an hriat duh te an lo hrilh a. Audit report behchhana endik te chu hlawhfa rawihna, Interpretation centre sakna, soil & moisture conservation atana senso, sangha note leina, prismatic compass 8, netlon roll 126 hmanna, polybag 38 quintal leina leh hmanna, ramngaw chereu a thing leh mau phunbelh, phul leh ram ruak a thingphun leh mau hmun siam te an ni. Heng hmalakna hrang hrang atan hian Mizoram Forest Department chuan Rs.180.145 lakhs kum 2007 leh 2010 inkar khan a hmangral a. Sum hmanralna leh a taka hmalakna te hi para 2.2 of C&AG Reports 2009-2010 ah doubful expenditure ti a ziah lan a nih avangin Tamdil Wetland Project chu tlawh a zirchiang an nih thu PAC chuan Forest Department hotute chu hrilhin an thilhmuhte sawiho tura Review Meeting an thut leh hunah thutlukna an siam chauh tur thu an sawi ni. PAC member te chuan Mizoram tana hmalakna ah te thildiklo a awm a nih chuan tumah enliam leh ngaihdam a rem dawn loh thu an sawi a. Project-te tha taka kalpui zel a pawimawh rualin sum hmanna hrang hrang te pawh a hmanna tur diktak account head ah ziahfel thlip thlep thin te a pawimawh tel thu pawh Interpretation centre a PAC member te meeting ah hian tarlan a ni bawk a ni. PAC member te hian Tamdil kam a Forest Department enkawl thing leh ramhmul khawina tual ah state tree, herse tiak an phun theuh nghal a ni.