Vawiin khan Aijal Club-ah UNODC (United Nations Office on Drugs and Crime) leh WORLD VISION India tangkawp chuan Mizoramah ruihhlo vanga hriselna leh khawtlang nuna harsatna leh tlakchhiatna thlengte do kawnga pawl hrang hrang thawhhona tih chak leh zual dan tur zir hona hun a buatsaih a. He hun hi Khuallian Health Minister Pu Lal Thanzara chuan a hawng.

Minister Pu Lal Thanzara chuan ruihhlo a harsatna nei, a bikin HIV Positive-te hi khawtlanga an tlangnel zawk nan leh, an nun siam tha turin khawtlang hruaitute leh kohhran chu tun aiin an inhawn zau zawk a pawimawh a tih thu a sawi a. Drop-in Centre neih chungchanga harsatna awm thin thu tarlangin, hemi kawngah hian mipuiin rilru zau tak a put a pawimawh a ni, a ti a. Ruihhlo bansan tawh ten ruihhlo do kawnga inhnamhnawih a, hna tangkai tak tak an thawk chu anmahni leh midang tana malsawmna a ni a ti a; Ruihhlo do kawnga thawktu leh mi thahnemngai hrang hrangte chu harsatna an tawh chang leh an hnathawhin awmzia neilova an hriat chang pawhin beidawng duh lova tanpui ngaite tan damdawi tha ber an ni tih inhre thin turin Pu Lal Thanzara chuan kalkhawmte chu a fuih a ni.

Vawiin hunah hian “Strengthening Community Partnerships to Combat Health and Social Consequences of Drug Use in Mizoram” tih thupui hman niin, tlawmngai pawl hrang hrangte an tel a. Mithiamte atangin ruihhlo do kawnga thawhho theih dan kawng tha zawk leh chak zawkte, tangkai taka ruihhlo do kawnga ruihhlo bansan tawhte telh chungchangte, ruihhlo hman avanga natna hrang hrang awm thei te leh chipchiar taka Mizorama ruihlo hrang hrangte zir leh sawihona hun nilenga hman a ni.