Ram roreltu Minister leh MLA te puala Mizo Academy of Sciences-in a buatsaih Advocacy Workshop on Oil & Natural Gas Exploration in Mizoram chu vawiin chawhnu dar 1:00 khan I&PR Conference Hall ah neih a ni a, Chief Minister Pu Lal Thanhawla’n a hmanpui.
Pu Lal Thanhawla chuan Zoram leilung hausakna haichhuah zirhona buatsaih a ni chu lawmawm tiin ram hruaitu leh mithiam kalkhawm te chuan ram leilung hausakna chak taka haichhuah a nih a, ram-in a hman tangkai theih nan hlawkna a thlen ngei a beisei thu a tarlang a. Ram hmasawnna tura theihtawpa hmalak a pawimawh hriain Sorkar pawhin Mizorama leilung hausakna zawn hna thawk mektu Company te pawh an thawh chak tawk lohna ah te khakin theihtawpa a nawr reng dan te a sawifiah bawk. Mizoram MP pahnih Pu Vanlalzawma leh Pu C.L.Ruala ten Sorkar Laipui lama theihtawp chhuaha hemi kawnga hma an lakna ah Pu Lal Thanhawla chuan lawmthu a sawi bawk. Leilung hausakna zawn hna thawktu Company te hnuaiah Mizo thalai tam zawk an thawh theih nan thalai lehkhathiam tak tak te inbuatsaih zel turin a chah bawk.
Advocacy Workshop kaihruaitu MAS President Dr H.Lalthanzara chuan ram hruaitu leh mithiam ten ram leh hnam tana thil tha inpawh tlang taka sawiho tul an tih avanga Workshop chu buatsaih a nih dan te a sawifiah a, an sawmna ngaipawimawha Minister leh MLA thahnem tak an kal theih avangin lawmthu a sawi bawk.
Workshop ah hian Geology & Mineral Resources Department Director Dr H.Lallenmawia’n Mizoram leilung hausakna haichuah dinhmun (Oil & Natural Gas Exploration Scenario in Mizoram) tih leh, Dr K.Vanlaldinpuia’n Leilung hausakna zawnchhuahnaa fimkhurna tur leh rawtna te (Oil & Natural Gas Exploration in Mizoram - Precursory Measures and Suggestions) tih thupui hmangin presentation an hmang a, Finance Minister Pu Lalsawta hovin sawihona leh inzawhfiahna hun an hmang zui nghal a ni.
Advocacy Workshop ah hian Mizoram Legislative Assembly Speaker Pu Hiphei, Minister Pu Romawia, MP Pu Vanlalzawma te bakah Parliamentary Secretary leh MLA thahnem tak an tel a ni.
Mizo Academy of Sciences (MAS) hi Mizo te zinga science pawimawhna leh tangkaina thehdarh tur leh tihhmasawnna tura pawl din a ni a, science graduate chin member ah inziah luh theihin tunah hian member 380 an nei mek a ni. Directorate of Science and Technology bultumin scientific journal Science Vision an chhuah thin a, Registrar of Newspapers for India (RNI) leh International Standard Serial Number (ISSN) ah te registered thlap niin internet ah a duh apiang tan chhiar theih a ni. MAS hi Mizoram Sorkar hnuaia Mizoram Biodiversity Board leh RUSA Council ah member an ni a, kum tinin Environment & Forests Department nen tangkawpin kangmei ven, thing leh mau humhalh hna te an thawk thin a ni. Science & Technology Department nena tangkawpin science kumpuan bawhzuina seminar/ awareness campaign te an buatsaih thin bawk. Class XII Examnaa science subject-a fail te tan coaching class an buatsaihsak thin bawk. Science & Technology Department bultumin Tuirial bawlhhlawh paihna hmun enkawl dan leh boruak leh hriselna a nghawng theih dan zirchianna an thawk mek bawk a ni.
