Mizorama Branch 28-na ni turin State Bank of India Sihphir Branch chu vawiin khan Chief Minister Pu Lal THanhawla chuan a hawng.

Hawnna inkhawm Sihphir Community Hall-a neihah Chief Minister chuan Sihphir khua mipuite chu thahnemngai taka kuthnathawk thin an nihna hian Bank neih hi an phu hle a ni a ti a. Hetianga SBI hotuten Sihphir mipuite hman tangkai tur Branch thar hawn theiha siam a ni chu a lawmawm hle a ni a ti. Chief Minister chuan Mizote hi kan khawsak phak tawk piahlama thenawmte thil neih neih ve kan tum thin hian leiba kan insiam phah nasa a ni a ti a. Chuvangin leiba kan neihte rulh kan harsat a, kan rul tha duh lova, harsatna tam tak kan insiam thin a ni a ti. Tunah hian Mizorama financial institution kan neih ZIDCO chu a nung che che chauh tawh a ni a ti. Chuvangin loan kan lakte hi tha taka rulh hi kan tih tur a ni a ti.

Chief Minister chuan Bank hi hnathawk theia awm tir tur chuan mipui ten tangkai taka kan chhawr a tul a, kan chawm nun reng hi a mamawh ber a ni a ti. Five Year Plan 11-na a tum, hmasawnna in mi zawng zawng nghawng (inclusive growth) a ni a, hei hi 12th Plan ah pawh nasa zawka kalpui tum a ni tiin, Chief Minister chuan sum peipunna lamah pawh mipuite tangkaipui theih zawnga kalpui tur a ni a ti. Sihphir mipui iskut chingtute chanvo chu a kharchhawngtute hlawkna aia tih tam hi sorkar chuan a ngaipawimawh zawk a ni a ti a. Champhai district chhunga grape winery plant neitu ten grape wine man tihsan an nawrna chu, a grape chingtute chanvo a pun ve dawn chuan tihsan remtih a ni a ti.

Chief Minister tawiawmtu, Bialtu MLA Pu R.Lalrinawma, Chairman, Law Commission chuan Sihphir khaw mi ten kan nghahhlelh em em SBI Bank kan nei thei ta hi a lawmawm takzet a ni a ti a, Sihphir tan hmasawnna ruhrel pawimawh tak pakhat kan nei ta a ni a ti.

SBI Zonal Office, Shillong a Dy General Manager Pu Sanjiv Bokil chuan hetiang ang branch hawnna ropui hi ka la hmu ngailo a ni a ti a. Mizoram Rural Bank nen thawkdun tur an nih thu a sawi bawk.

Chief Minister hi a nupui Pi Lal Riliani bakah Pu K.Lianzuala, Chairman, KVI in an tawiawm bawk a ni.