Kolkata a hmunpui nei, VAANI Deaf Children’s Foundation in Mizorama naupang bengngawngte puala ‘Status of Deaf Children in Mizoram’ tih thupui hmanga seminar, vawiina I&PR Auditoriuma an buatsaihah Chief Minister Pu Lal Thanhawla chu khuallian a ni.

Chief Minister chuan YMA Day a hetiang seminar buatsaih a ni chu a inhmeh hle a ni tiin, YMA member zawng zawngte chu chibai bukin duhsakna a hlan a. Mihring mihrinna-a michaklo, rualbanlo tia kan kohna hi a lamdan tawngkam kan thlak a tha hle tawha a hriat thu a sawi a. Sorkar laipui pawhin hetiang michaklo ten an dikna leh chanvo an hmuh theih nan leh a enkawltu tur ministry leh Women and Child Welfare Ministry te siama, dan zawm tur a siam zel thute sawiin, chutiang lama hna thawka inhmang, tlawmngai pawl VAANI in hma ala hi a fakawm hle a ni a ti a. Mihringte hi Pathianin a duh ang ngeia min siam vek kan ni a, kan intluk tlang vek a ni a ti.

Chief Minister chuan 11th leh 12th Plan kan hman takah te khan hriselna leh education lam a ngaihpawimawh bik thu a sawi a. Naupang, ri hriatna lama harsatna nei hi Mizoramah 1000 bawr vel awm anga chhut ani tiin, a zat chiah erawh hriat anilo a ti a. Hetiang harsatna kan neihte hi kan ei leh inin thui tak a hril a ni tiin, naupai te chu fimkhur leh zual turin a chah a ni.VAANI leh Spastic Society of Mizoram ten thawh hona tha tak an nei chu a lawmawm hle a ni a ti a. Thawhho tulna ah sorkar ang pawhin a inpeih reng a ni a ti. Sorkar hna a reservation chungchangah, a percentage zawnga kal anih avangin harsatna a awm thin thu a sawilang bawk.

VAANI hi kum 2005 August thla khan India rama bengngawngte tanpui turin, ‘trust’ anga din a ni a, hetiang lama tlawmngai pawl ding awm chhun ala ni. Mizoram ah hian Spastic Society of Mizoram nen thawhdunna kum 2009 October thla khan an siam tawh nghe nghe a ni. A tum ber chu naupang bengngawng ten nunphung pangngai an hmuh theihna tura an chanvo leh dikna te humhalh sak a, chenna, school leh khawtlang nuam siam sak a ni. Nu leh Pa te leh zirtirtute hnenah bengngawng naupang enkawl dan training an pe thin bawk a ni.

VAANI Director Brinda Crishna chuan powerpoint hmangin an pawl thil tumte leh dinhmunte a sawifiah a. Veng khat ang leh khaw khat angah te bengngawng awmzat chiah hriat a harsat thin thu a sawi a. Tunah hian Mizoram bakah Jharkhan, West Bengal, Gujarat, Assam, Karnataka leh Meghalaya ah te hma an lak thu a report a. India ram pumah naupang bengngawng maktaduai 3 an awm mek a ni tiin, kumtin naupang bengngawng 25,000 an pian thin thu a sawi bawk a. Nu leh Pa ten an fa chu a bengngawng a ni tih kum 3 an tlin hnuah chauh an hriatchhuah thin avangin khua a tlaizo hman thin a ni a ti.