Chief Minister Pu Lal Thanhawla chuan vawiin khan Mizoram State Cooperative Union (MSCU) buatsaih, New Serchhip YMA Hall-ah District Level Seminar on  Cooperatives neih chu khuallian niin a hmanpui.

Chief Minister chuan Cooperative Society chu society huapzo tak, tupawh len theihna leh mi harsate dawmkangtu pawl pawimawh tak a nih thu sawiin, cooperative movement hlawhtlinna chuan thui takin ram hmasawnna a puih theih thu a sawi a. Mizorama cooperative society ding zingah mipuiin an chhawr tangkai tak tak awmin, chungte chu sawrkarin a din nilovin mi thahnemngaite kutchhuak a nih thu a sawi a; Mizoram chu state dangte nen khaikhin chuan literacy rate a san avangin leh chi leh chi inkar thliarna a awm ve loh avangin cooperative movement chu chak leh zuala a than theih tur thu a sawi a.

Chief Minister chuan ram hmasawnna tura hmalakna NEDP chu market economy a state a inhlankai theih nan sawrkarin duang a, India rama Management Institute tha ber pawl IIM-Kolkata te nen thawkhovin, kuthnathawktute leh thalai mithiamte, remhria leh taima ten an thiamna leh tuina kawng hrang hrangah pui a kawng kawhhmuhin, eizawnna zahawm an neih theih nan entrepreneurship lamah hmalak mek a nih thu a sawi a. Chungah chuan cooperative movement nena hma la kawp a indawm chho tawn a theih thu leh, chutianga thawhho dan tha te ngaihtuah a that thu a sawi. India rama economy thang chak ber pali zinga Mizoram a tel te, kum khata India pumpuia mimal sum lakluh chawhrual aiin Mizorama mimal sum laklawh chu cheng sang chuanga a tam zawk thu te tarlangin, sawrkar hnathawkte thahnemngaihna vang a nih thu a sawi a. Chu dinhmun aia tha lehzual ah a awm theih thu leh, a innghahna chu kuthnathawktute a ni tiin Chief Minister chuan cooperative movement chu chak leh zawka kalpui a nih chuan chak leh zualin kan thang thei ang, a ti a ni.

Mizoram State Cooperative Union Ltd. hi society tangrualin an din niin, March ni 29, 1975 khan Cooperative Department hnuaia register a ni a. Tunah hian Mizoramah cooperative society in register 1,500 bawr vel an awm tawh a ni. MSCU hian a thawh ber chu Mizoram district hrang hranga cooperative society member-te hnenah zirtirna (Education and Training) pek a ni a; kum kalta 2017-2018 chhung pawh khan District Level Seminar 15, Youth Education Programme vawi 7 leh Cooperative Awareness Programme vawi 15 lo neih tawh a ni a. Zirtirna hi Society-te tan mai bakah thalai zirlaite hnenah zirtirna an lo pe tawh thin a ni.

Vawiina Serchhip District Level Seminar on Cooperatives neih hi Pi Lalnuntluangi Hrahsel, Chief Executive Officer, MSCU chuan kaihhruaiin, Pu Lianthangpuia, MSCU President hnen atangin thusawi ngaihthlak a ni bawk a. Pi C. Vanlalchhungi, ARCS, Serchhip District chuan lawmthu sawiin chawhma session a khar a. Chawhnu Session-ah cooperative thil tumte leh cooperative pawimawhna chungchangah Pi T.C Lalchawimawii, Field Education Officer, MSCU chuan zirtirna a pe a ni.