Chief Minister Pu Lal Thanhawla chuan Zirtawpni kalta ni 27th May 2011 khan Serchhip DC office hmuna District Consumer Forum building chhawngchung zawk chu Serchhip District Fisheries Development Officer's (DFDO) Office atan a hawng.

Hawnna inkhawm Serchhip DC Conference Hall-a neihah Chief Minister chuan Serchhip chu sangha dil siam nana remchang nei tha vaka a hriat loh thu sawiin, Thenzawl chu hmun remchang tak (potential ngah) nia a hriat thu a sawi a. Sorkar hnathawk an lo pung ringawt pawh hi a khua tan chuan malsawmna a ni Pu Hawla chuan a ti a. Serchhip district chu district vannei tak an nih vangin a mipuite hian lawmthu kan sawi mawlh mawlh tur a ni a ti. Chief Minister chuan Serchhip leh Thenzawl chu phir khawpui (twin city) ang an ni a, Mizoram hmun laili a awm an nih angin hmasawnna kal zelah thil pawimawh tak tak dah chhoh a, hmun pawimawha siam tum mek zel a ni a ti. Lamchhip khua kaltlanga Hmuifang leh Chhiahtlang inkalpawhna hi kawng tha taka siam tum anih thu sawiin, hei hian Serchhip kawngdung hi ala ti pawimawh deuh deuh dawn a, chuvangin hmasawnna siamnaah mipuite inhawnna leh hmathlir tha tak nei chunga hmun thawl awm thei zawnga ngaihtuahna hmang reng thin turin a chah a ni.

Chief Minister chuan Mizote hi ringtu inti si, midangte tan hnawksak nih kan hreh ta lo lutuk chu pawi a tih thu a sawi a. In kan sak danah leh kan bungrua kan dah danahte hian vantlang ram nek pang chunga ti hi a pawi hle a ni a ti  Ringtu inti si te hi Pathian Nung khian kristian lemchang min ti ang tih a hlauhawm hle a ni a ti. Chuvangin a chhelai siam tha tu ni tura koh vek kan ni a ti.

Diltu nih leh dil tur hria nih hi changkanna emaw bengvarna emaw a nilova, kutdawh rilru putna mai zawk nia a hriat thu sawiin, Pu Lal Thanhawla chuan mi thawhchhuahsa dila thil tha tih tum kan tam ta lutuk chu pawi atih thu a sawi a. Kan tih ve theih reng chu dil kher lova tih ve mai tur a ni a ti a. Kan thawhchhuah atang chauh hian midangte tan malsawmna nih kan tum zawk tur a ni a ti.

Chief Minister hian Serchhip JN Hospitalin kum 50 tlin lawmna denchhena Lok Sabha MP Pu C.L.Ruala'n  Waiting Shed sakna atan cheng nuai 10 a rawn pek thu a sawi bawk.

Khualzahawm Fisheies Minister Pu H.Liansailova chuan an sorkar chuan office hnathawk thei tur chauh an hawng thin a ni tiin, hawn theih nazawng an hawng duhlo a ni a ti a. Minister chuan Mizorama thil kan thar chhuahte reng reng hi India levela tehna atang chuan kan hniam hle a ni a ti a, hei hi a enkawlna lam a that tawk loh vang a ni a ti. Sangha chi, fish seed hi pawnlam atanga lalut tawh lovin Mizoram chhung ngei a nei tura hmalak a ni a ti.

Hawnna inkhawm hi Pu T.Sangkunga, Secretary to GOM, Fisheries in a kaihruai a. Chief Minister hi a nupui Pi Lal Riliani bakah Health Minister Pu Lalrinliana Sailo, Pu KS Thanga leh Pu S.Laldingliana, Parliamentary Secretaries te leh Pu H.Darzika, DC ten an tawiawm a ni.