Chief Minister Pu Lal Thanhawla chuan vawiin khan Serchhip Chanmari Vengtharah Divisional Horticulture Officer’s (DHO) Office building thar cheng nuai sawmruk senga sak chu a hawng.

Hawnna inkhawm Training Halla neihah Chief Minister chuan Serchhip District tana DHO’S Office hawn a ni chu Serchhip district tan hmasawnna rahbi kan tuk belhna a ni a ti a, mipui ten lawm nachang an hriat ngei a bseisei thu a sawi a.. Ram thang mek India angah chuan kuthnathawk an tam ber tiin, Pu Hawla chuan heng mite innghahna ber pawh agriculture leh a kaihhnawih horticulture te, fishery te, soil & water conservation te leh sericulture ah te a ni a ti a.Chuvangin agriculture leh a kaihhnawih departmentte hi ngelnghet taka siam an tul a ni a ti. Mizoram hi thlai chitin that duhna a ni tiin, nachang kan hriat loh vang leh kan peih tawk loh avang tein a rah kan hmulo mai a ni a ti a. Rah tha kan hmuh theihna turin agiculture leh a kaihhnawih department te hi tih changtlun zel a tul hle a ni a ti.

Chief Minister chuan kuthnathawktu ten phur taka hna an thawh theih nana anmahni enkawltu te hi hreawm lova an thawhna hmun kan siam angai a ni tiin, district hrang hrangah chumi atan chuan hma kan la chho mek zel a ni a ti a. Office thar chu neitu chan changa a hmang turte zawng zawngin englai pawha fai taka vawng reng turin a chah a, mi inthlahdah ten an inthlahdah ngam lohna turin vawngfai tlat reng turin a chah nawn a ni.Chief Minister chuan an sorkarin a tum ber chu Mizote tumah in awt biklo leh intluk tlang taka siam a, ei leh bar leh sum leh paia intodelha, hnam changkang leh zahawma siam a ni a ti a. Hemi ti tur hian a kawng pawh kan hria a, kan kalpui mek a ni a ti. Sorkar hnathawkte hlawh tur NLUP ah an hmang tih mi tuten emaw an sawi thin chungchangah Pu Lal Thanhawla chuan sorkar hnathawk te hlawh pek tur a remchan loh lai tein NLUP sum puk thin zawk anih thu a sawi bawk a ni.

Pu K.S.Thanga, Parliamentary Secretary pawhin thusawiin, Serchhipin kum sawm chhung hmasawnna an hmuh loh laiin tun kum nga chhung hian hmasawnna nasa tak hmuh theih a ni a ti a.NLUP hi central sorkar hotu ten India rampuma model atana an duh avangin Mizoramah an enchhin hmasa a ni tiin, a hlawhchham a thianglo a ni a ti. NLUP avang liau liaua RKVY hi Mizoramin a dawn a nih thu a sawi bawk a. Tlangram lo neih 50% a tlakhniam phah laiin, buh thar erawh 12% in a pung thung a ni a ti.

Serchhipah hian horticulture office hi kum 2003 khan din alo ni tawh a. Tuna DHO’s office thar awmna hmun ram hi Rs.3 lakhs a an lei a ni a. A building basement hi Chowkidar chenna atana ruahman a ni a, a chung chiah hi farmerte tana training hall a ni a, a chung leh kawngan hi office a ni.

Hawnna inkhawm hi Pu T.Sangkunga, Secretary, Horticulture in a kaihruai a, Chief Minister Hi a nupui Pi Lal Riliani bakah Pu R.Lalrinawma, Chairman, Law Commission in an tawiawm a ni.

Attachment

  • Loading attachment...