Vawiin khan I&PR auditorium-ah Zo Re-Unification Organization (ZoRO) General Headquarters huaihawtin ‘Khawvel Hnam Tualtote Ni’ (International Day of World Indigenous Peoples) Vawi rukna lawmna inkhawm neih a ni a, Health Minister Pu Lalrinliana Sailo chuan Khuallian niin a hmanpui.

Thu sawiin Pu Lalrinliana Sailo chuan, “ZoRO hruaitute chu mi ril tak tak, hnam tana mi hlu, thinlunga awmze nei taka Zoram leh Zohnahthlak hmangaihtute an ni,”a ti a. ZoRO chu Zohnahthlakte tana malsawmna hnar a nih ngei a beisei thu a sawi bawk. Kan awmna hmun theuhah Pathian mi tak tak ni tur leh, a hranga inbawl khawm lo turin a chah bawk. State sorkarin hmasawnna atana project hrang hrang a kalpui mekte chu ZORO-in Indigenous Peoples’ Right, a taka a chan hma chuan, thalaite zirna leh eizawnna hmakhua thlirna avangin kalpui  rih a tul thu a sawi a; “Hmasawnna leh changkannain mitinte min chiah hneh tawh avangin, kan thalaite chu engpawh lo hmachhawn ngam tura buatsaih an tul a ni,” a ti bawk. Zo Inpuiin hmabak a chhawpchhuahte chu tha a tih thu sawiin, lo tuipuia, lo zawm a tul a ni, a ti a, tuna kan hruaitute thachhangdawl tur hian Mizo thalai- taima, tumruh leh hmathlir zau kan mamawh a ni, a ti bawk. 

Khuallian chuan UNO leh Zo Inpui Flag-te pawtpharhin, ZoRO hruaitu chatuan ram pan ta, mi 13-te sunna hun hman a ni bawk. He hunah hian kalkhawmte chuan Resolution pathum lai an passed bawk.

He hun hi Vice President, ZoRO, Pu R.Zamawia chuan kaihruaiin, Rev. Dr.K.Thanzauva’n hunserh a hmang a; Pu Keihawla Sailo, Vice President, ZoRO chuan in lawmna thu a sawi bawk. Pu R.Lalchhuana, General Secretary, ZoRO hnen atangin report ngaihthlak a nih hnuah, ZoRO President, Pu R.Thangmawia’n he ni lo pianchhuah dan sawina hun a hmang bawk. Mizoram state pawn atanga lo kal te leh NGO hrang hrang aiawhte atangin thusawi tawi ngaihthlak a ni a, Pu Malsawma Colney, Vice President, ZoRO chuan lawmthu sawina hun a hman hnuah, Rev.Robawia’n malsawmna tawngtaiin he hun hi a khar a ni.