Lunglei faina kawnga mite zirtir tura din, Clean Lunglei chuan vawin khan hnatlang an nei a. Lunglei khawchhung kawngpui dunga vantlang zunin an sil fai te, Pukpui Centenary lungphun bawr vel then fai hna te leh zin mite tawngtaina te an thianfai bawk. Lunglei khaw chhung College leh veng hrang hrang atang in sanitation volunteer thahnem tak an thawk chhuak a, UD & PA Department motor-a tui phurin vantlang zun in silfai hna hi thawh a ni a, hemi atan hian PHE Department in tui an ngaihtuah sak a. Hnatlang hi Clean Lunglei Committee Chairman, Pu Joseph Lalhimpuia, Vice Chairman, High Powered Committee, Lunglei hova thawh a ni.

Clean Lunglei ah hian Pu Joseph Lalhimpuia, Vice Chairman, HPC, Lunglei chu Chairman niin Pu V. Sapchhunga, IAS, DC, Lunglei chu Co-Chairman a ni a. Clean Lunglei hnuaiah hian Sanitation Volunteer din a ni a, Lunglei khawchhungin faina leh thianghlimna te, chei mawina kawngah te hma  a sawn theih nan mipui te hnenah leh zirlaite zingah awareness pek te, bawlhhlawh atanga hlawkna hmuh dan in kawhhmuh leh bawlhhlawh sawngbawl dan tih hmasawn te, bawlhhlawh paihna lama thawktute thawhpui te a tum dawn a ni.

Clean Lunglei ah hian Footballer Lalrindika Ralte, Zaithiam Pensy B. Lalthangliani leh Bethsy Lalrinsangi te chu Ambassador an ni a. Bawlhhlawh tih hla satu Vuantea chu Special Campaigner a ni bawk

 Clean Lunglei Guiding Principles:

Clean Lunglei hian The Mizoram Sanitation and Solid Waste Management Policy hi innghahna atan ber a hmang a. He Policy in a sawi bawk pawh a hnuai a mi ang hi Clean Lunglei kalphung tura ruahman te an ni. (Hetiang chauh hian hmalak tur tihna erawh a ni lo).

1.  Mipui leh faina lama hnathawktute hnenah faina leh bawlhhlawh paih danah zirtirna pek te,

2.  Zirna In, Office leh pawl hote mawhphurhna, an theihna leh hmalak dan remchang kawhhmuh te,

3.  Khawtlang leh vantlang hruaitute leh tlawmngai pawl te chu bawlhhlawh sawngbawl dan hlawk zawk leh fel fai zawk an hriat theih nan a hmalak pui leh hemi kawnga tha an thawh theih dan kawng kawhhmuh te

4.  Bawlhhlawh atanga hlawkna hmuh dan in kawhhmuh leh bawlhhlawh sawngbawl dan tihhmasawn te,

5.  Vantlang hriselna leh thianghlimna kawnga mipui tih tur inzirtir

6.  Mipui vantlang tana hnawk lo leh remchang tura inthiarna, vantlang zunin leh tuihawk luankawr felfai neih dan kawng zawn te

7.  Vantlang hmun leh kawngsir cheimawi te.